Sumqayıt şəhərində baş verən növbəti faciə şəhər ictimaiyyətini sarsıdıb. Şəhərin 30-cu məhəllə ərazisində 18 yaşlı gəncin meyiti aşkarlanıb.

Sumqayit.tv Den.az-a istinadən xəbər verir ki, 2007-ci il təvəllüdlü Müşfiq Mirmehdi oğlu Fəttayevin cansız bədəni yaxınları tərəfindən tapılıb. Hadisə yerinə dərhal təcili tibbi yardım çağırılsa da, həkimlər həkiməqədər ölüm faktını qeydə alıblar. Ölümün dəqiq səbəbinin müəyyənləşdirilməsi üçün meyit müvafiq məhkəmə-tibbi ekspertizasına göndərilib.

Vəfat edən gəncin Azərbaycanda tanınmış siyasi xadim, partiya sədri **Mirmahmud Mirəlioğlu**nun nəvəsi olduğu bildirilir. Onun oğlu Mirmehdi Fəttayevin iki övladı var idi – böyüyü 18 yaşlı Müşfiq Fəttayev, kiçik oğlu isə məktəblidir.

Qeyd edək ki, bu, Mirəlioğlu ailəsində baş verən ilk faciə deyil. Müxtəlif illərdə ailə üzvlərindən bir neçəsi vaxtsız şəkildə dünyasını dəyişib.

Sumqayit.tv olaraq bildiririk ki, hadisə ilə bağlı araşdırmalar davam edir. Şəhərdə geniş rezonans doğuran bu faciə ilə bağlı rəsmi qurumların mövqeyi və ekspertiza nəticələri açıqlanan kimi oxucularımıza təqdim ediləcək.

17-12-2025, 22:52 48