Sumqayıt şəhərində 31 Dekabr – Dünya Azərbaycanlılarının Həmrəylik Günü və Yeni il münasibətilə ümumşəhər bayram tədbiri təşkil olunub.

Sumqayit.tv xəbər verir ki, tədbirdə əvvəlcə Ulu Öndər Heydər Əliyevin və Azərbaycanın ərazi bütövlüyü uğrunda şəhid olmuş qəhrəmanların xatirəsi bir dəqiqəlik sükutla yad edilib.

Bayram mərasimində Sumqayıt Şəhər İcra Hakimiyyətinin başçısı Zakir Fərəcov, millət vəkilləri, hüquq-mühafizə orqanlarının, idarə və təşkilatların rəhbərləri, ictimaiyyət nümayəndələri iştirak ediblər.

Zakir Fərəcov çıxışında iştirakçıları Dünya Azərbaycanlılarının Həmrəylik Günü və Yeni il münasibətilə təbrik edib, 31 Dekabrın tarixi əhəmiyyətindən və Ulu Öndər Heydər Əliyevin milli həmrəyliyin formalaşmasındakı rolundan bəhs edib.

Qeyd olunub ki, Prezident İlham Əliyevin rəhbərliyi ilə Azərbaycan güclü inkişaf mərhələsini yaşayır, 44 günlük Vətən müharibəsində və Qarabağda keçirilən antiterror tədbirləri nəticəsində ölkənin ərazi bütövlüyü və suverenliyi tam təmin olunub.

Şəhər rəhbəri ötən ilin Sumqayıt üçün uğurlu olduğunu vurğulayıb, qarşıdakı dövrdə həyata keçiriləcək layihələr barədə məlumat verərək sakinlərə firavan həyat arzulayıb.

Tədbir çərçivəsində şəhərin ictimai həyatında fəallığı ilə seçilən bir qrup şəxs fəxri fərmanlarla təltif olunub. Bayram tədbiri tanınmış incəsənət nümayəndələrinin iştirakı ilə konsert proqramı ilə davam etdirilib.

27-12-2025, 11:50 195