Bakı Uşaq və Gənclər Teatrının aktrisası Əsmər Qurbanova Moderator.az-a verdiyi açıqlamada sənət yolundan, uzun fasilədən və Sumqayıt teatr təcrübəsindən danışıb.

O bildirib ki, Sumqayıt Dövlət Dram Teatrında 16 il çalışdıqdan sonra bəzi narazılıqlar səbəbindən teatrdan inciyərək ayrılıb və 12 il səhnədən uzaq qalıb:

“Teatr mənim üçün ailədir, dostdur, yoldaşdır, sirdaşdır… Sumqayıt Dövlət Dram Teatrında ilk böyük səhnəyə çıxışım “Tramvayı kim oğurladı?” tamaşasında oldu. Daha sonra bir çox tamaşalarda müxtəlif obrazlar oynadım. Amma 16 il çalışdığım teatrda qəlbən inciyib uzaqlaşdım. 12 il səhnədən uzaq qaldım.”

Əsmər Qurbanova qeyd edib ki, dəfələrlə Sumqayıt Dövlət Dram Teatrından dəvət almasına baxmayaraq, qayıtmayıb. Bunun əvəzinə, dostlarının məsləhəti ilə Bakı Uşaq və Gənclər Teatrına gedib və orada özünü doğma hiss edib:

“Kollektiv məni o qədər doğma qarşılayıb, bağrına basdı ki, yaşamaq həvəsimi yenidən qazandım. Uşaqlarla işləmək mənim üçün böyük zövqdür, səhnədə özümü gənc hiss edirəm.”

Aktrisa həmçinin film həyatının o qədər də uğurlu olmadığını vurğulayıb və əlavə edib ki, gənc rejissorlar onu tanımır, amma teatrda istedadlı aktyor və aktrisaların çox olduğunu görmək xoşdur:

“Mən də çəkilməyi istəyirəm, amma çağırmırlar. Sənətimi bəyənən gəlib məni çəkəcək.”

Əsmər Qurbanova Sumqayıtla bağlı xatirələrindən danışarkən qeyd edib ki, teatrın ona verdiyi təcrübə və sevgi, səhnəyə olan bağlılığını heç vaxt azaldmayıb.

Səhnəyə qayıdan aktrisanın hekayəsi, Sumqayıt teatrının gənc sənətçiləri üçün də ilhamverici nümunə hesab olunur.

6-01-2026, 14:53 22