Çindən Azərbaycana poçt göndərişlərinin və bağlamaların çatdırılmasında müvəqqəti ləngimələrin, eləcə də fasilələrin yaranması ehtimal olunur.

Sumqayit.tv xəbər verir ki, bu barədə Rəqəmsal İnkişaf və Nəqliyyat Nazirliyinin tabeliyində fəaliyyət göstərən İnformasiya Kommunikasiya Texnologiyaları Agentliyi (İKTA) məlumat yayıb.

Agentliyin açıqlamasına əsasən, Çində rəsmi bayramlarla əlaqədar olaraq fevralın 15-dən 23-dək olan müddət qeyri-iş günləri hesab olunur. Bu tarixlərdə Çin ərazisində yerləşən anbarların böyük hissəsinin iş qrafikində məhdudiyyətlər tətbiq ediləcək.

Bildirilir ki, yaranan məhdudiyyətlər səbəbindən bağlamaların Azərbaycana göndərilməsində fasilələr və gecikmələr müşahidə oluna bilər. Daşıma və göndəriş proseslərinin bayram günləri başa çatdıqdan sonra mərhələli şəkildə bərpa ediləcəyi gözlənilir.

İKTA vətəndaşlara onlayn sifarişlər zamanı bu amilləri nəzərə almalarını tövsiyə edib.

13-02-2026, 22:10 15