İnzibati cərimələrin qaytarılması qaydası təsdiqlənib

Baş nazir Ali Asadov inzibati cərimələrin qaytarılması qaydasının təsdiqlənməsi ilə bağlı qərar imzalayıb.

Qərara əsasən, qaydalar İnzibati Xətalar Məcəlləsi-nə uyğun hazırlanıb və artıq ödənilmiş, düzgün tətbiq edilməmiş və ya səhv ödənilmiş inzibati cərimələrin (o cümlədən hesablanmış dəbbə pulu ilə birlikdə) geri qaytarılması prosedurunu müəyyən edir.

Hansı hallarda cərimə geri qaytarılacaq?

Yeni qaydalara əsasən, ödənilmiş inzibati cərimə aşağıdakı hallarda dövlət büdcəsindən qismən və ya tam şəkildə geri qaytarılacaq:

1.Qərarda və ya elektron protokolda nəzərdə tutulmuş məbləğdən artıq cərimə ödənildikdə

2.İnzibati cərimə barədə qərar şikayət və ya protest əsasında ləğv edildikdə və ya dəyişdirildikdə

3.Texniki səhv səbəbindən dövlət büdcəsinə inzibati cərimə kimi vəsait daxil olduqda

4.İnzibati icraat aparılmayan şəxsin adından cərimə ödənildikdə

Bu hallarda artıq ödənilmiş məbləğ vətəndaşa geri qaytarılacaq.

Qaytarılma müddəti

Artıq ödənilmiş vəsaitin qaytarılması üçün vətəndaşın yazılı və ya elektron müraciəti tələb olunur. Müraciət təqdim edildikdən sonra vəsait 20 gün ərzində geri qaytarılmalıdır.

Məhkəmə qərarı olduqda

İnzibati cərimənin qaytarılması ilə bağlı məhkəmə qərarı qəbul edilərsə, həmin qərar qanunvericiliyə uyğun qaydada icra ediləcək.

5 il müddətində tələb etmək hüququ

Qaydalara əsasən, inzibati xəta üzrə icraat aparılan şəxs və ya cəriməni ödəyən digər şəxs artıq ödəmənin qaytarılmasını cərimənin ödənildiyi tarixdən etibarən 5 il müddətində tələb edə bilər.

11-03-2026, 19:19 41