Azərbaycanda məşğulluq sahəsində yeni texnologiyaların tətbiqi planlaşdırılır. Sumqayit.tv xəbər verir ki, Əmək və Əhalinin Sosial Müdafiəsi Nazirliyi gələcəkdə iş axtaranlar üçün süni intellekt əsaslı tövsiyə sistemi yaratmağı nəzərdə tutur.

Sumqayit.tv  Report.az-a istinadən xəbər verir ki,hazırlanacaq sistem vətəndaşın təhsil səviyyəsini, iş təcrübəsini, bacarıqlarını və maraqlarını analiz edərək ona uyğun vakansiyaları avtomatik şəkildə təqdim edəcək.

Yeni mexanizmə əsasən istifadəçinin anket məlumatları və bacarıqları sistemə daxil ediləcək, süni intellekt isə həmin məlumatları mövcud vakansiya bazası ilə müqayisə edərək uyğun iş yerlərini müəyyənləşdirəcək. İstifadəçilərə “Sizə uyğun vakansiyalar” bölməsində ən uyğun təkliflər təqdim olunacaq.

Qeyd olunur ki, bu yenilik iş axtaranların əmək bazarında daha düzgün istiqamətləndirilməsinə, vakansiyalara çıxış imkanlarının genişlənməsinə və məşğulluq xidmətlərinin səmərəliliyinin artırılmasına kömək edəcək. Eyni zamanda sistem işəgötürənlərə də uyğun namizədləri daha operativ tapmağa imkan verəcək.

12-03-2026, 20:38 35