Bakının Tbilisi prospektinin Həsən Əliyev və Şəfayət Mehdiyev küçələri ilə kəsişməsində yeni yol layihəsinin icrasına başlanılır.
Sumqayit.tv-in məlumatına görə, Rəqəmsal İnkişaf və Nəqliyyat Nazirliyi yanında Azərbaycan Yerüstü Nəqliyyat Agentliyi (AYNA) bildirib ki, dəyişikliklər nəticəsində sola dönən nəqliyyat vasitələri üçün axından izolyasiya edilmiş xüsusi cib tipli zolaqlar təşkil olunacaq.
Bu yenilik sayəsində dönmə əməliyyatı edən sürücülər ümumi nəqliyyat axınından ayrılacaq, düzünə hərəkət edən avtomobillər isə maneəsiz şəkildə yollarına davam edə biləcəklər.
Layihəyə əsasən, Tbilisi prospekti ilə Həsən Əliyev küçəsinin kəsişməsində nizamlanmayan hərəkət qaydası ləğv ediləcək, yeni işıqforlar quraşdırılacaq, yolun buraxıcılıq qabiliyyəti artırılacaq və piyadaların təhlükəsizliyi təmin olunacaq.
Qeyd olunub ki, görülən işlər 2025–2030-cu illər üzrə Dövlət Proqramı çərçivəsində həyata keçirilir və Bakı–Sumqayıt nəqliyyat dəhlizi üzrə aparılan layihələrin tərkib hissəsidir.
17-03-2026, 17:59
382
