Milli Hidrometeorologiya Xidməti-nin məlumatına görə, yaxın günlər ərzində ölkə ərazisində havanın yağıntılı keçəcəyi, bəzi yerlərdə yağıntıların intensiv olacağı proqnozlaşdırılır. Ayrı-ayrı dağ çaylarından qısamüddətli sel keçəcəyi, şimşək çaxacağı ehtimal olunur.

Sumqayit.tv xəbər verir ki, bununla bağlı Fövqəladə Hallar Nazirliyi məlumat yayıb.

Məlumata əsasən, mülayim qərb küləyinin güclənməsi və temperaturun yüksəlməsi ilə əlaqədar yüksək dağlıq ərazilərdə qar uçqunu ehtimalı da var.

Nazirlik əhaliyə müraciət edərək təhlükəsizlik qaydalarına ciddi riayət etməyə çağırıb. Bildirilib ki, intensiv yağıntıların səbəb ola biləcəyi sel və daşqınlardan qorunmaq üçün sel təhlükəli ərazilərdən uzaq durmaq, belə vəziyyətlə üzləşdikdə dərhal yaxınlıqdakı yüksəkliyə qalxmaq tövsiyə olunur.

Həmçinin ildırım təhlükəsi zamanı elektrik cihazlarını şəbəkədən ayırmaq, telefonla danışmamaq, açıq havada elektrik xətləri, antena və hündür ağacların yaxınlığında dayanmamaq, mümkün olduqda daha alçaq sahədə sığınmaq məsləhət görülür.

Bundan əlavə, qar uçqunu ehtimalı olan yüksək dağlıq və dik yamaclı ərazilərdən uzaq durmaq tövsiyə edilir.

Rəsmi qurum vətəndaşları hava şəraitini nəzərə almağa və ehtiyatlı olmağa çağırır.

Dünən, 12:26 15