Sumqayıt şəhərində yaşıllıqların məhv edilməsi ilə bağlı növbəti iddia gündəmə gəlib.

Sumqayit.tv xəbəb verir ki, tanınmış jurnalist Anar Xanlarovun paylaşdığı məlumata görə, şəhərin 45-ci məhəlləsində, “Əyri dom” kimi tanınan yaşayış binasının həyətində 40-50 illik iki şam ağacı kökündən çıxarılaraq yerə aşırılıb.

Bildirilib ki, hadisənin təbii səbəblərlə baş verməsi ehtimalı azdır. Çünki son günlər ərazidə güclü külək müşahidə olunmayıb. Videogörüntülərdə də ağacların qurumadığı açıq şəkildə görünür.

Məsələ ilə bağlı kim və ya kimlər tərəfindən, hansı məqsədlə bu addımın atıldığı sual doğurur. Qeyd olunur ki, belə ağacların bu vəziyyətə düşməsi uzun illər tələb edir və əgər bu hal insan müdaxiləsi nəticəsində baş veribsə, ciddi qanun pozuntusu hesab oluna bilər.

Jurnalist son dövrlər Sumqayıtda yaşıllıqların məhv edilməsi hallarının artdığını da vurğulayaraq, Ekologiya və Təbii Sərvətlər Nazirliyi, Sumqayıt Şəhər İcra Hakimiyyəti və Baş Prokurorluğu məsələyə reaksiya verməyə çağırıb.
Məsələ ilə bağlı Sumqayıt Rayon İcra Hakimiyyətindən Oxu.Az-a bildirilib ki, son günlər müşahidə olunan intensiv yağıntılar nəticəsində torpaq qatının yumşalması nəticəsində bir neçə ünvanda, həmçinin 45-ci məhəllə ərazisində ağaclar aşıb.
Vurğulanıb ki, hadisə ilə bağlı aidiyyəti qurumlar tərəfindən zəruri tədbirlər görülür.

VİDEO LİNK: (58)Sumqayıt şəhərində yaşıllıqların məhv edilməsi ilə bağlı növbəti iddia... | TikTok

2-04-2026, 09:50 23