Milli Məclisin deputatı, Yeni Azərbaycan Partiyası İdarə Heyətinin üzvü, filologiya elmləri doktoru Elnarə Akimova 2026-cı ilin aprel ayı üzrə nəzərdə tutulan növbəti vətəndaş qəbulunu keçirib. Qəbul zamanı müxtəlif sosial təbəqələri təmsil edən vətəndaşlar öz müraciət və problemlərini birbaşa deputatın diqqətinə çatdırmaq imkanı əldə ediblər.
Sumqayit.tv xəbər verir ki, görüş çərçivəsində vətəndaşların müraciətləri diqqətlə dinlənilib. Millət vəkili onları narahat edən məsələlərlə ətraflı tanış olub. Səsləndirilən problemlər əsasən işsizlik, kanalizasiya xətlərinin yararsız vəziyyəti, eləcə də bəzi küçələrin asfalt örtüyünün olmaması və ya bərbad vəziyyətdə olması ilə bağlı olub.
Qəbul zamanı ictimai-siyasi proseslərə maraq göstərən gənclərin iştirakı da diqqət çəkib. Belə ki, Sumqayıt Dövlət Universitetinin Politologiya fakültəsinin Sumqayıt şəhər YAP təşkilatında təcrübə keçən tələbələri də görüşdə iştirak edərək vətəndaş müraciətlərinin dinlənilməsi və araşdırılması prosesini yaxından izləyiblər. Bu iştirak onların praktik biliklərinin artırılması baxımından əhəmiyyətli olub.

Deputat tərəfindən hər bir müraciət qeydiyyata alınıb və qaldırılan məsələlərin həlli istiqamətində mövcud qanunvericilik çərçivəsində zəruri addımların atılacağı bildirilib. Vətəndaşların sosial rifahının yaxşılaşdırılması və onların gündəlik problemlərinin operativ həlli məqsədilə aidiyyəti qurumlarla əlaqəli şəkildə işlərin davam etdiriləcəyi vurğulanıb.
Qəbul zamanı vətəndaşlarla səmimi dialoq mühitinin yaradılması, onların problemlərinə həssas yanaşma nümayiş etdirilməsi bir daha göstərib ki, insan amili və sosial məsələlər daim diqqət mərkəzində saxlanılır.

Dünən, 12:44 42