Azərbaycan Hava Yolları (AZAL) 2026-cı ilin may ayında bayram və tətil günlərində Naxçıvana səfər etməyi planlaşdıran sərnişinlərə biletlərini əvvəlcədən əldə etməyi tövsiyə edib.

Bu barədə “Report”a AZAL-dan məlumat verilib.

Bildirilib ki, bayram günləri ilə əlaqədar olaraq 9–11 və 27–31 may 2026-cı il tarixlərində Bakı–Naxçıvan–Bakı marşrutu üzrə uçuşlara tələbatın artacağı gözlənilir.

Qeyd olunan dövrdə sözügedən marşrut üzrə gün ərzində 8 müntəzəm reysin (gediş-gəliş 16 reys) həyata keçirilməsi planlaşdırılır. Artan sərnişin tələbatını qarşılamaq məqsədilə əlavə olaraq gün ərzində 5–10 əlavə reys (10–20 gediş-gəliş) də nəzərdə tutulur.

AZAL-dan bildirilib ki, əlavə reyslərin sayı hər günün sərnişin tələbatına uyğun olaraq müəyyən ediləcək.

Qurum həmçinin qeyd edib ki, biletlərin səyahət tarixindən əvvəl alınması sərnişinlər üçün daha rahat planlama imkanı yaradır və uçuşların daha səmərəli təşkili baxımından vacibdir.

Aviabiletləri AZAL-ın rəsmi saytından, mobil tətbiqindən və kassalardan əldə etmək mümkündür.

Bu gün, 15:33 5