Bilgəh–Novxanı–Pirşağı–Sumqayıt avtomobil yolu layihəsinin paytaxtdakı nəqliyyat sıxlığının azaldılmasına mühüm töhfə verəcəyi bildirilib.

Sumqayit.tv xəbər verir ki, bunu Azərbaycan Avtomobil Yolları Dövlət Agentliyinin (AAYDA) İdarə Heyəti sədrinin institusional inkişaf məsələləri üzrə müşaviri Fariz Əzizov Ümumdünya Şəhərsalma Forumunun 13-cü Sessiyası (WUF13) çərçivəsində keçirilən tədbirdə deyib.

Onun sözlərinə görə, layihə M1 Bakı–Quba magistral yolunu M4 Bakı–Şamaxı magistralı ilə birləşdirəcək və regional nəqliyyatın şəhər mərkəzinə daxil olmadan hərəkətinə imkan yaradacaq.

Fariz Əzizov bildirib ki, yeni yol xüsusilə Abşeronun şimal-şərq yaşayış məntəqələrində, o cümlədən Sumqayıt istiqamətində yaşayan sakinlərin hərəkət imkanlarını genişləndirəcək.

Qeyd olunub ki, layihə nəqliyyat sıxlığının azalmasına, logistikanın sürətlənməsinə, vaxt itkisinin minimuma enməsinə və paytaxt üzərində ekoloji yükün azalmasına xidmət edəcək.

Mənbə: AZƏRTAC

Bu gün, 19:04 6