İyunun 10-da Müharibə, Əmək və Silahlı Qüvvələr Veteranları Təşkilatında “Modern İnkişaf və Ailə” İctimai Birliyinin sədri, YAP Veteranlar Şurasının üzvü Zərifə Quliyevanın müəllifi olduğu “Qəhrəmanlıq zirvəsi” kitabının təqdimat mərasimi keçirilib.

Sumqayit.tv xəbər verir ki, tədbir Azərbaycan Respublikasının Dövlət Himninin səsləndirilməsi, Ümummilli Lider Heydər Əliyevin və Vətən uğrunda canından keçmiş şəhidlərin xatirəsinin bir dəqiqəlik sükutla yad edilməsi ilə başlayıb. Daha sonra Heydər Əliyevin həyat və fəaliyyətinə həsr olunmuş videoçarx nümayiş etdirilib, Zərifə Quliyevanın şeiri əsasında hazırlanan “Azərbaycan bayrağı” musiqi kompozisiyası təqdim olunub.

Tədbirdə çıxış edən Milli Məclisin deputatı Vüqar İsgəndərov kitabın Azərbaycanın hərb tarixinin təbliği və qəhrəmanlarımızın tanıdılması baxımından mühüm əhəmiyyət daşıdığını vurğulayıb. Vətən Müharibəsi Qəhrəmanı Zaur Hüseynov isə 44 günlük Vətən müharibəsində nümayiş etdirilən qəhrəmanlıq nümunələrinin gələcək nəsillərə çatdırılmasının vacibliyindən danışıb.

Çıxış edən professor Rəna Mirzəzadə, Azərbaycan Deflimpiya Komitəsinin baş katibi Namiq Novruzov, yazıçı-publisist Şərəf Cəlilli və akademik Sudeyf İmamverdiyev kitabın qəhrəmanlıq tariximizin təbliğinə mühüm töhfə verdiyini bildirərək müəllifi təbrik ediblər. Tədbir çərçivəsində Sudeyf İmamverdiyev Zərifə Quliyevanı Türk Ağsaqqalları Birliyinin diplomu ilə təltif edib.

Şəhid ailələrinin nümayəndələri və qazilər də çıxış edərək Vətən müharibəsinin əhəmiyyəti, şəhidlərin xatirəsinin yaşadılması və müəllifin yaradıcılığı barədə fikirlərini bölüşüblər.

Müharibə, Əmək və Silahlı Qüvvələr Veteranları Təşkilatının sədri, polkovnik Cəlil Xəlilov çıxışında qəhrəmanlarımızın tanıdılmasının gənc nəslin vətənpərvərlik ruhunda formalaşmasında mühüm rol oynadığını qeyd edib. O, Zərifə Quliyevanı təşkilatın “Fəxri Fərmanı” ilə təltif edib.

Tanınmış vəkil Şəfiqə Nağıyeva isə müəllifin ictimai fəaliyyətini və şəhid ailələri ilə həmrəyliyini yüksək qiymətləndirib.

Sonda çıxış edən Zərifə Quliyeva Ümummilli Lider Heydər Əliyevin Azərbaycan dövlətçiliyinin inkişafındakı xidmətlərindən bəhs edib, Prezident İlham Əliyevin rəhbərliyi ilə qazanılmış tarixi Zəfərin əhəmiyyətini vurğulayıb. Müəllif şəhidlərin xatirəsinin daim yaşadılmasının hər bir vətəndaşın mənəvi borcu olduğunu bildirib.

Tədbirin sonunda şəhid ailələri və qazilərə “Qəhrəmanlıq zirvəsi” kitabı hədiyyə olunub, iştirakçılarla xatirə şəkilləri çəkdirilib.

10-06-2026, 21:42 101