Azərbaycanda köhnə nəqliyyat vasitələrinin utilizasiyası proqramı çərçivəsində avtomobillərin qəbulu davam edir. Utilizasiya prosesinin həyata keçirildiyi şəhərlər arasında Sumqayıt da yer alır.

Sumqayit.tv xəbər verir ki, bu barədə "Təmiz Şəhər" ASC-nin mətbuat xidmətinin rəhbəri Orxan Cabbarlı Bakıda keçirilən "Təhlükəsiz mobilliyə doğru" adlı tədbirdə məlumat verib.

Onun sözlərinə görə, 2024-cü ilin oktyabr ayında start verilən proqram çərçivəsində ötən həftəyədək ölkə üzrə ümumilikdə 30 min avtomobil utilizasiyaya qəbul edilib.

Bildirilib ki, yay aylarında utilizasiya prosesi daha da intensiv xarakter alır. Bölgələrdə uzun illər istifadəsiz qalan avtomobillər xüsusi evakuatorlarla Bakı, Gəncə, Abşeron və Sumqayıtda fəaliyyət göstərən utilizasiya məntəqələrinə daşınaraq təhvil verilir.

Orxan Cabbarlı qeyd edib ki, gələcəkdə utilizasiya zamanı avtomobilin tamlığı da qiymətləndiriləcək. Belə ki, nəqliyyat vasitəsinin mühərrik və sürətlər qutusu üzərində olduqda, utilizasiya qarşılığında veriləcək məbləğ buna uyğun müəyyən ediləcək.

O, həmçinin bildirib ki, utilizasiyaya təhvil verilən avtomobillər arasında 2025-ci il istehsalı olan bir neçə BYD və Changan markalı avtomobil də var. Onun sözlərinə görə, həmin nəqliyyat vasitələrinin qəza nəticəsində yararsız hala düşdüyü ehtimal edilir və bu hal avtomobillərin keyfiyyəti ilə bağlı hər hansı ümumi nəticə çıxarmağa əsas vermir.

Bu gün, 17:51 8