Azərbaycan Respublikasının Qida Təhlükəsizliyi Agentliyi (AQTA) pandemiya dövrünün tələblərinə, bu sahədə müvafiq qanunvericiliyin icrasına, həmçinin yeni növ koronavirusun (COVID-19) profilaktikasına dair Nazirlər Kabinetinin Qərarı ilə təsdiq edilmiş metodiki göstərişlərin icrasına nəzarət məqsədilə ictimai iaşə obyektlərində reydləri davam etdirir.

Sumqayit.tv xəbər verir ki, nəzarət tədbirləri çərçivəsində 2021-ci il dekabrın 23-də ölkə üzrə 376 ictimai iaşə obyektində 651 monitorinq keçirilib. Monitorinqlər zamanı 3 müəssisədə qanunvericiliyin tələblərinin kobud şəkildə pozulması faktları aşkar olunub. Aşkar edilmiş nöqsanlarla bağlı İnzibati Xətalar Məcəlləsinə uyğun olaraq müvafiq tədbirlər görülüb.
Pozuntular aşkar edilmiş ictimai iaşə müəssisələri aşağıdakılardır:
1. Bakı şəhəri, Səbail ‎rayonu, Salyan şosesi ilə Ə. Yaqubov küçəsinin kəsişməsində yerləşən, fiziki şəxs Cəfərov Səxavət Əjdər oğluna məxsus kafe;
2. Bakı şəhəri, Yasamal rayonu, H. Cavid pr., ev d, 556/557-ci məhəllədə yerləşən, fiziki şəxs Emin Kəklikə məxsus “Böyük Firat” restoranı;
3. Bakı şəhəri, Suraxanı‎ rayonu, Yeni Günəşli qəs., “D” yaşayış sahəsi, ev 20 ünvanında yerləşən, fiziki şəxs Əhmədov Rizvan Əvəz oğluna məxsus “Ləvəngi” restoranı;
Qeyd edək ki, AQTA tərəfindən Bakıda, eləcə də regionlarda fəaliyyət göstərən ictimai iaşə obyektlərində monitorinqlərin miqyası genişləndirilib. Hazırda AQTA müfəttişləri tərəfindən respublika üzrə monitorinqlər davam etdirilir və qaydalara əməl etməyən sahibkarlıq subyektləri barədə ən sərt tədbirlər görüləcəkdir.