Yanvarın 12-də İqtisadiyyat Nazirliyinin təşkilatçılığı ilə Sumqayıt Kimya Sənaye Parkının Peşə Təhsil Mərkəzinə media-tur təşkil edilib.

Sumqayit.tv xəbər verir ki, Peşə Təhsil Mərkəzinin direktoru vəzifəsini icra edən Yadullah Babayev media nümayəndələrinə Mərkəzin fəaliyyəti haqqında məlumat verib. Bildirilib ki, 2020-ci il sentyabrın 14-də Prezident İlham Əliyevin iştirakı ilə Peşə Təhsil Mərkəzinin açılışı olub. 6 korpusdan ibarət olan Mərkəz 500 tələbənin təhsil alması üçün nəzərdə tutulub. Korpuslarda 23 tədris otağı, 13 laboratoriya, kitabxana, kompüter otağı, akt zalı, yeməkxana, idman zalı və inzibati otaqlar var.
Peşə Təhsil Mərkəzi Sumqayıt Kimya Sənaye Parkının ərazisində yaradılmış ilk təhsil müəssisəsidir və sənaye müəssisələrinin tam əhatəsində yerləşir. Mərkəzin tələbələri mütəmadi olaraq bu sənaye müəssisələrində təcrübə-dərs proqramlarında iştirak edir və tədris prosesində qazanılmış nəzəri biliklərini daha da təkmilləşdirirlər. Mərkəzdə çalışan müəllimlərin əksəriyyəti bu sənaye müəssisələrinin peşəkar mühəndisləridir.
İlk tədris ilində (2020-2021-ci illər) Peşə Təhsil Mərkəzində 5 ixtisas üzrə kadr hazırlığı həyata keçirilib, 2021-2022-ci tədris ilində bəzi sahələrdə kadr hazırlığına ciddi tələbatın olması səbəbindən daha 3 yeni ixtisas yaradılaraq sayı 8-ə çatdırılıb.
Hazırda Peşə Təhsil Mərkəzində torna və frezer dəzgahların, proqramla idarə olunan dəzgahların operatoru, sənayedə quraşdırma işləri üzrə usta, elektrik avadanlıqlarına xidmət və təmir üzrə elektrik montyoru, avtomatika üzrə usta, aqroservis mütəxəssisi, isitmə-soyutma, havalandırma sistemləri və avadanlıqları üzrə montajçı, veb-dizayner və proqram təminatçısı ixtisasları üzrə 150-dən çox tələbə təhsil alır. Bu ixtisaslardan, sadəcə, veb-dizayner və proqram təminatçısı ixtisasları ödənişlidir. Təhsil müddəti 1 ildir və qəbul müsahibə yolu ilə həyata keçirilir. Müsahibədə tam orta təhsilli şəxslər iştirak edirlər. Tədris müddətində dövlət sifarişi əsasında təhsil alan tələbələr təqaüdlə təmin olunurlar.
Peşə Təhsil Mərkəzi bir çox sənaye müəssisələri ilə əməkdaşlıq edir. Mərkəzin ən fəal, savadlı tələbələri (əsasən təcrübi dərslərdə fəal olan tələbələr) əməkdaşlıq edilən sənaye müəssisələrində işlə təmin edilə bilmələri üçün müvafiq tədbirlər görülür. Mərkəzi uğurla bitirənlər sonda diplomla təltif olunurlar.
KİV nümayəndələri Peşə Təhsil Mərkəzində yaradılan şərait, dərs prosesləri, laboratoriyalar və s. tanış olublar. Media tur iştirakçıları tələbələrin Sumqayıt Kimya Sənaye Parkının rezidenti "Azertexnolayn” MMC-də keçdikləri təcrübə proqramı çərçivəsində keçirilən təlimləri izləyiblər.