Keçən il ölkəmizdə turizmi inkişaf etdirəcək çox təqdirə layiq və ağıllı qərar qəbul edilmişdi. Ərəb Körfəzi ölkələrində (BƏƏ, Saudiyyə Ərəbistanı Krallığı, Qətər, Küveyt, Oman Sultanlığı, Bəhreyn) yaşayan bütün (milliyyətindən asılı olmayaraq) rezidentlərə Azərbaycana vizanı Bakı havalimanında almaq imkanı verilmişdi.  

Məhz bu qərarın nəticəsində Bakı yenidən  ərəb və qeyri-ərəb qonaqların üzünü görməyə başladı. Noyabr-Dekabr-Yanvar aylarında otellərin üzü gülməyə başladı. Vito/Viano sürücüləri təkrar evlərinə çörək aparmağa başladı. Taksilər, restoranlar, kafelər, mollar v.s obyektlər xarici qonaqların sayəsində pul qazanmağa başladı. 

Amma… dəlinin yadına daş düşdü…. 

1 fevral 2022-ci il tarixindən etibarən Operativ Qərargah ya bilmirəm başqa kimsə bu qərarı dəyişərək turizmə ziyan vurmağın yolunu kəşf etdi. 

Yeni qərara əsasən BƏƏ-dən başqa digər Ərəb Körfəzi ölkələrində yaşayan rezidentlər artıq Azərbaycana gəlib vizanı havalimanında almaları üçün mütləq qaydada həmin ölkənin vətəndaşı ilə bərabər Azərbaycana gəlməlidir.

Bu o deməkdir ki, biz turizmi inkişaf etdirmək istəmirik. Bizə neft bəsdir. Hər şey onsuz da yaxşıdır….

Biz niyə axı Gürcüstan və Türkiyə kimi qonşu ölkələrdən dərs almırıq? 

Türkiyədə liranın ucuzlaşması sayəsində turist axını az qala birə yüz nisbətilə artıb. Otellər qonaq əlindən partlayır. Sezon, qeyri-sezon fərqi yoxdur artıq… Hətta İrəvandan İstanbula birbaşa budcə reysləri açılıb. Qəpik-quruşa uçurlar. 

Bu nə məntiqsizlikdir axı? Təsəvvür edin Ərəb Körfəzində cəmi hesabla deyək 50 milyon insan yaşayırsa, onların az qala 30 milyonu digər millətlərdən olan rezidentlərdir. Yəni indi bu rezidentlər Azərbaycana niyə gəlsin axı? Axı Gürcüstan ümumiyyətlə o rezidentərə heç “visa-on-arrival” tələb etmir. Qalmışdı ki, hələ desin yanında körfəz ərəb vətəndaşıyla gəl… Deyir xoş gəlirsən, viza da yoxdur. Gəl pulunu Gürcüstanda xərclə. 

Hələ vaksinlilərdən bizimkilər mütləq şəkildə PCR testi də tələb edir. Nə Gürcüstan, nə də Türkiyə vanksinlilərdən ölkəyə girişdə PCR testi istəmir.

Bu nə qərarlardı axı qəbul edilir? Kim və hansı ağılla edir bunu? 

Bundan sonra niyə axı gəlmə turizmi ilə məşğul olan yerli şirkətlər Azərbaycana turist gətirilməsiylə məşğul olsun? 

Elədirsə elə Gürcüstan və Türkiyəyə turistlərin cəlb edilməsilə məşğul olub daha çox pul qazanarlar da……

Bu Turizm Nazirliyi, Turizm Agentliyi, Turizm Bürosu, Turizm Assosiyasiyası nə işə baxır??? 

Təsəvvür edin ki, bu yeni qərarı biz bədbəxt turistlərdən eşidirik. Gəlib Bakı havalimanıdna ölkəyə buraxılmadıqlarını bizə deyirlər….

Ay kişi, bir qərar qəbul edəndə ən azı 1 ay qabaqcadan bunu elan etmək lazımdır. Bütün turizm şirkətlərinə yazılı xəbərdarlıq et ki, işlərini bilsinlər. 

Fevral ayına camaat otellər bron edib, sürücüləri işlə təmin etməyi planlaşdırıb. Durub birdən heç bir xəbərdarlıq etmədən sərhəddə qonaqları ölkəyə buraxmamaq əmrini verirsiz… 

Bəs o turistlərin boş-boşuna sərf etdiyi təyarə biletləri, əsəbləri, səyahət planlarının puç olmasını kim kompensasiya edəcək???

Heçmi Azərbaycanın imicini düşünmürsüz? Axı bizi artıq ciddiyə almayacaqlar bundan sonra…

Mən yalnız bir qənaətə gəlirəm. Vəzifələrdə öz işini bilməyənlər oturub. Əks halda belə absurd qərarlar verilməz…

Elşən Rəhimov