Vətən Müharibəsinin iştirakçısı, Füzuli, Xocavənd, Cəbrayıl, Hadrut uğrunda gedən döyüşlərdə iştirak edən Aqşin Əlizadənin səhhətinə problem yaranıb.
Sumqayit.tv-in məlumatına görə bu barədə qazimizin anası Yeksarə Səfərova “Qafqazinfo”ya müraciət edərək bildirib ki, 1994-cü il təvəllüdlü Əlizadə Aqşin Eyvaz oğlu hərbi xidmətini Naxçıvan Muxtar Respublikasının “N" saylı hərbi hissəsində kəşfiyyat bölüyündə keçib və leytenant hərbi rütbəsi alıb.
A.Əlizadə 2020-ci il sentyabrın 21-dən təlimlərə cəlb olunub, sentyabrın 27-dən işğal olunmuş torpaqlarımızın azad olunması uğrunda zabit kimi döyüşlərə qatılıb.
Yanvarın əvvəllərində hərbi xidmətdən tərxis olunduqdan sonra onun üzü, əlləri, ayaqlarının şişmiş vəziyyətdə olduğu aşkar olunub. Həkimə müraciət etdikdən sonra ona kəskin böyrək çatışmazlığı diaqnozu qoyulub. Məlum olub ki, soyuqlamadan sonra 2-3 ay ərzində müdaxilə olmadığına görə böyrəkləri tamamən sıradan çıxıb.
Həkimlər Aqşin Əlizadəyə böyrək köçürülməli olduğunu bildirib, atası və anası donor olmaq üçün müraciət ediblər.
Y.Səfərova qeyd edir ki, Aqşinin atasının səhhətində bəzi problemlər olduğuna görə onun böyrəyinin köçürülməsinə qərar verilib: “Analizlərə 4-5 min manatdan çox xərcimiz çıxdı. İndi 12 min manat təşkil edən əməliyyat xərcini ödəyə bilmirik. Daha sonra dövlət rəhbərliyinə, Prezidentimizə və onun xanımı hörmətli Mehriban Əliyevaya müraciət etdik. Çox sağ olsunlar, əməliyyat xərcinin ödənməsi üçün vəsait ayrılmasına göstəriş verdilər. Buna görə bir ömür boyu onlara borcluyuq. Mənim böyrəyim oğluma köçürüldükdən sonra Aqşində temperatur yüksəldi, ishal, qusma başladı. Analizlər etdikdə qanından kreatinin normadan çox yüksək olduğu aydınlaşdı. Uzun müddət oğluma evdə müalicələr təyin olundu. May ayının əvvəllərində vəziyyəti kəskinləşdi, koronavirusa yoluxdu, sağaldıqdan sonra yenidən temperaturu yüksəlməyə başladı, iştahsızlıq, ishal yarandı”.
A.Əlizadənin anası bildirir ki, bu dəfə də müalicəyə 4 min manat xərc çıxandan sonra pulları bitdiyi üçün onu evə gətiriblər: “Bu dəfə bütün bəlaların üstünə qan azlığı da əlavə olundu. İndi yenidən məcburən Mərkəzi Klinik Xəstəxanaya yatırmışıq, gündə bir dənə iynəsinə 800 manat ödəyirik. Son bir ayda 10 min manata yaxın xərcimiz çıxıb. Artıq bütün imkanlarımız tükənib, borc alınması mümkün olan hər kəsdən borc almışıq. Yoldaşım da, mən də müəllimlik qazancımızla gündə min manata yaxın xəstəxana xərclərini qarşılamaq mümkün deyil.
İndi də oğluma qoyulan böyrəyin ayrılmasından qorxuruq. Buna görə də Aqşini Türkiyəyə aparıb, orada müayinə etdirmək istəyirik. Amma əlimizdə heç nə qalmayıb. Ümidimiz yenə də dövlətimizə, xalqımızadır. İnanırıq ki, dövlətimiz, xeyirsevər xalqımız erməni gülləsinin yan keçən balamın əlimizdən getməsinə imkan verməyəcək”.
Aqşin Əlizadə Vətən Müharibəsində iştirakına görə “Döyüşlərdə fərqlənməyə görə” medalı və Fəxri fərmanla təltif olunub.