Xırdalanda Vətənimizin bütövlüyü uğrunda canından keçən, "Azərbaycan Bayrağı" ordeni, "Kəlbəcərin azad olunmasına görə”, "Vətən uğrunda”, "Xocavəndin azad olunmasına görə”, "Cəbrayılın azad olunmasına görə”, "Füzulinin azad olunmasına görə” medallarına layiq görülən şəhid kapitan Nurlan Hamlet oğlu Mustafayevin 32-ci doğum günü qeyd olunub.
Abşeron Rayon İcra Hakimiyyəti başçının müavini Gülnar Rəhimova, YAP Abşeron rayon təşkilatının sədri, şəhid ailələri və qazilər tərəfindən İkinci Fəxri xiyabanda uyuyan şəhidimizin məzarı ziyarət olunub.
Şəhidin anım mərasimi Xırdalan şəhərindəki Heydər Əliyev Mərkəzində davam etdirilib. Mərasimdə Azərbaycan Respublikasının Dövlət Himni oxunub, ümummilli lider Heydər Əliyevin və vətənimizin azadlığı uğrunda canından keçən şəhidlərimizin əziz xatirəsi bir dəqiqəlik sükutla yad edilib. Sonra şəhidimiz Nurlan Mustafayevin həyat və fəaliyyətini özündə əks etdirən sənədli film nümayiş olunub.
Tədbirdə Gülnar Rəhimova bildirib ki, ölkəmizdə, o cümlədən Abşeron rayonunda şəhid ailələrinə və qazilərə böyük diqqət və qayğı göstərilir. Şəhidlərimizin xatirəsinin əbədiləşdirilməsi, unudulmaması və daim yaşadılması istiqamətində müxtəlif tədbirlər həyata keçirilir.
Daha sonra şəhidin həyat yoldaşı Günay Mustafayeva, YAP Abşeron rayon təşkilatının sədri Abbas Əliyev, din xadimi Rasim Xudaverdiyev, Xüsusi Təyinatlıların qaziləri, şəhid ailələri və veteranları İctimai Birliyinin Abşeron bölməsinin sədri Süleyman Cəfərov və digərləri çıxış edərək Azərbaycanın qazandığı qələbədən, idiglərimizin qəhrəmanlıqlarından, ordumuzun gücündən, dövlətimizin şəhid ailələrinə və qazilərə göstərdiyi qayğıdan danışıblar.
Sonda incəsənət nümayəndələrinin iştirakı ilə bədii kompazisiya təqdim edilib.
25-07-2022, 06:24
241
