Avropalı siyasətçilər Donald Trampın ikinci prezidentlik müddətinə hazır olduqlarına inanırlar, lakin onların etimadı əsassızdır.
Musavat.com xəbər verir ki, bu barədə Amerikanın "Foreign Policy" (FP) jurnalı yazıb. Jurnalın məqaləsində qeyd edilir ki, Avropanın siyasi isteblişmenti müdafiə xərcləri sahəsində ciddi problemlərlə üzləşir.
Nəşr yazır ki, Avropa Amerika liderinin ikinci prezidentlik müddətinə hazır olduğuna inanır, çünki “o, artıq bir Tramp administrasiyasından sağ çıxıb” (2017-2021). Məqalədə qeyd edilir ki, avropalı siyasətçilər Trampın ikinci müddətinin öhdəsindən necə gəlmək üçün “reseptləri” olduğuna inanırlar, lakin “səhv hədəflərə fokuslanan və siyasi böhrandan yayınan Avropa Trampın ABŞ prezidenti olaraq ikinci müddətinin çağırışlarına hazır deyil”.
Məqalə müəllifinin yazdığı kimi, avropalı siyasətçilər hərbi xərclər də daxil olmaqla, edilməsi lazım olan dəyişikliklərin aktuallığını və miqyasını hələ dərk etməyiblər. Qeyd edilir ki, Avropa tezliklə “Amerika hava yastığını itirərək” müdafiəsiz qala bilər.
Nəşr yazır ki, Trampın məqsədlərindən biri Avropanı müdafiə etmək yükünü NATO müttəfiqlərinin üzərinə yükləməkdir. Bundan ötrü ABŞ-nin Avropadakı hərbi mövcudluğunu azaltmaq və təhlükəsizliyin təmin edilməsi üzrə məsuliyyəti Avropa İttifaqına üzv ölkələrin üzərinə qoymaq lazım gələcək.
Məqalədə həmçinin vurğulanır ki, Trampın Avropanın müdafiəsi ilə bağlı narahatlığı artıq “keçici dəb” deyil və Avropa “təhlükəsizlik üzrə qayğısız günlərinin bitdiyi reallığına oyanmalıdır”.