İranın Milli Təhlükəsizlik Ali Şurasının katibi Əli Laricani İslam dünyasına ünvanlanan müraciətlə çıxış edib.

Sumqayit.tv xəbər verir ki, İran rəsmisi regionda baş verən hadisələr fonunda müsəlman dövlətlərinin mövqeyini tənqid edib və onları həmrəyliyə çağırıb.

Laricani bildirib ki, danışıqların getdiyi bir vaxtda İran ABŞ və İsrail tərəfindən planlı hücumlara məruz qalıb. Onun sözlərinə görə, hücumların məqsədi ölkəni zəiflətmək və parçalamaq olub. O qeyd edib ki, hadisələr zamanı hərbi komandirlər, mülki şəxslər və dövlət strukturlarına yaxın olan şəxslər həlak olub, lakin buna baxmayaraq ölkə daxilində müqavimət güclənib.

İran rəsmisi çıxışında vurğulayıb ki, bəzi siyasi bəyanatlar istisna olmaqla, İslam ölkələrinin əksəriyyəti İran xalqına açıq dəstək verməyib. Onun sözlərinə görə, bu mövqe İslam həmrəyliyi prinsiplərinə uyğun deyil.

Laricani ABŞ və İsraili regionda əsas təhlükə adlandıraraq İranın onlara qarşı mübarizəni davam etdirəcəyini bildirib. O, həmçinin bəzi müsəlman dövlətlərinin İranın ABŞ bazalarına qarşı addımlarına etiraz etməsini də tənqid edib.

İran rəsmisi qeyd edib ki, Tehran öz ərazisinə qarşı istifadə olunan hərbi bazalara qarşı tədbir görmək hüququna malikdir və müsəlman ölkələrinə açıq sual ünvanlayıb:

“Bu gün qarşıdurmanın bir tərəfində ABŞ və İsrail, digər tərəfində isə müsəlman İran dayanır. Siz hansı tərəfdəsiniz?”

Müraciətin sonunda Laricani İslam ölkələrini birliyə çağıraraq bildirib ki, müsəlman dövlətlərinin həmrəyliyi regionun təhlükəsizliyi və müstəqilliyi üçün əsas şərtdir.

16-03-2026, 20:57 37