Sumqayıt şəhərində növbəti yaşıllaşdırma aksiyası təşkil olunub. Aksiya Nəsimi adına mədəniyyət və istirahət parkında, parkın ərazisində yerləşən Şəhidlər xiyabanının ətrafında həyata keçirilib.

Sumqayit.tv xəbər verir ki, tədbirdə şəhər ictimaiyyətinin nümayəndələri, şəhid ailələri, qazilər, eləcə də müxtəlif qurumların əməkdaşları iştirak ediblər. Aksiya çərçivəsində park ərazisində 200-dən çox şam ağacı əkilib, əkilən ağaclara aqrotexniki qulluq göstərilib və onların sağlam inkişafı üçün zəruri tədbirlər görülüb.

Bildirilib ki, keçirilən yaşıllaşdırma tədbirləri şəhərdə ekoloji mühitin yaxşılaşdırılmasına xidmət etməklə yanaşı, Vətən uğrunda canından keçən şəhidlərin xatirəsinə ehtiramın ifadəsidir. Bu cür aksiyaların davamlı keçirilməsi həm şəhərin yaşıllıq zonasının genişlənməsinə, həm də gənc nəsildə təbiətə qayğı və vətənpərvərlik ruhunun formalaşmasına töhfə verir.

18-03-2026, 11:02 78