Rəsmi Tehran yanvarın 29-da İrana təşkil edilən dron hücumundan sonra ilk dəfə əməliyyatla bağlı öz versiyasını açıqlayıb.
Sumqayit.tv  xəbər verir ki, hakimiyyətin versiyası İranın Təhlükəsizlik Şurasının katibi Əli Şamxaninin maliyyələşdirdiyi “Nournews” saytında dərc olunub.
Sayta danışan Təhlükəsizlik Şurasındakı məxfi mənbə həyata keçirilən hücumda kürd qruplaşmalarının iştirak etdiyini bildirib. Belə ki, bu qruplaşmaların üzvləri İraq Kürd Muxtar Vilayətinin ərazisində dron hazırlanması üçün müxtəlif detallar keçiriblər. Daha sonra isə bu detallardan dronlar hazırlanıb. Mənbə detalların İran ərazisinə ölkənin şimal-qərbindəki dağlar vasitəsilə qanunsuz şəkildə gətirildiyini iddia edib.
Sayt kürd qruplaşmalarına bu addımın atılması ilə bağlı əmrin xarici kəşfiyyat orqanlarından biri tərəfindən verildiyini qeyd etsə də, bunun hansı ölkəyə məxsus olduğunu yazmayıb.
Qeyd edək ki, yanvarın 29-da İranın 7 şəhərinə dron hücumu həyata keçirilib. Nəticədə İranın hərbi obyektlərində partlayışlar olub. Hücumun arxasında İsrailin olduğu güman edilsə də, nə Təl-Əviv, nə də Tehran bu faktı təsdiq edir. /Globalinfo.az/