“50 gündən çoxdur davam edən bu aksiyalar başlayan ilk gündən Azərbaycanın Rus İcması Rusiya sülhməramlıların müvəqqəti yerləşdiyi Azərbaycanın Qarabağ bölgəsində təbii sərvətlərin istismarını dayandırmağı tələb edən eko-fəallarımızın və QHT təmsilçilərimizin Laçın yolundakı fəaliyyətini dəstəkləyib”.
Bu sözləri Azərbaycanın Rus İcmasının sədr müavini Anastasiya Lavrina Globalinfo.az-a açıqlamasında deyib.
O, bildirib ki, bunu tələb etmək Azərbaycanın qanuni haqqıdır:
“Dünən Azərbaycanın Rus İcmasının və Rus Gəncləri Assosiasiyasının üzvləri aksiyaya qoşulub və indi fəal şəkildə bu aksiyada iştirak edirlər.
Ermənistan 30 il ərzində işğal etdiyi ərazilərdə Azərbaycana məxsus təbii yataqları qanunsuz istismar edib. Sonra bu təbii ehtiyatlar qanunsuz olaraq Ermənistan ərazisinə daşınıb və daha sonra ola bilsin ki, satılıb. Bəzi xarici şirkətlər Azərbaycan ərazisində yataqların istismarı ilə bağlı qanunsuz fəaliyyət göstəriblər. Şübhəsiz ki, 44 günlük Vətən müharibədən sonra Azərbaycanın hazırda tam nəzarətində olan ərazilərdə təbii yataqların qanunsuz istismarı dayandırıldı. Lakin təəssüf ki, rus sülhməramlıların müvəqqəti yerləşdiyi, etnik ermənilərin yaşadığı ərazilərdə hələ də bəzi yerlərdə bu qanunsuz fəaliyyət davam edir. Biz eko-fəallarımızla birlikdə bunun dayandırılmasını tələb edirik. Bizim ekoloqlara imkan həmin yataqlarda monitorinq aparmağa şərait yaradılmalı və müvafiq olaraq bu qanunsuz fəaliyyətlə məşğul olanlar cəzalanmalı, Azərbaycana buna görə kompensasiya ödənilməlidir”.

Anastasiya Lavrina
A.Lavrinanın sözlərinə görə, onlar iki gündür ki, aksiyanın keçirildiyi ərazidədirlər və artıq bir neçə avtomobil karvanının keçdiyinin şahidi olublar:
“Rusiya sülhməramlı qüvvələrinə məxsus və həmçinin, bu gün səhər Beynəlxalq Qızıl Xaç Komitəsinə məxsus avtomobil karvanı keçib. Şübhəsiz, burada hər hansı blokadadan söhbət gedə bilməz. Ermənistan hazırda öz diasporasını təşviq etməyə çalışır və müxtəlif ölkələrdə, eyni zamanda Ermənistanın siyasi xadimləri guya hansısa blokadanın olmasından danışırlar. Bu təmamilə yalan informasiyadır.
Burada materialları işıqlandıran insanlar, jurnalistlər var. Və biz indi şəxsən avtomobilin rahat şəkildə Laçın yolunda hərəkət etdiyini müşahidə edirik. Ona görə Laçın yolunun bloklanması haqda deyilənlər növbəti erməni feykidir”.
O, həmçinin qeyd edib ki, indiki situasiyada Azərbaycan xalqının nə qədər həmrəy, multikultural olduğunu, cəmiyyətimizin nə qədər multi-etnik olduğunu görmək mümkündür:
“Hal-hazırda burada vahid xalq olduğumuzu hiss edirik, çiyin-çiyinə qanuni haqlarımızın müdafiəsinə qalxmışıq. Etnik rus vətəndaşlar – biz azərbaycanlıyıq. Hamımız birlikdə eko-fəalların aksiyasında iştirak edirik. Xatırlayırsızsa, 44 günlük müharibə zamanı bütün etnik qruplar ümumi ideya ətrafında birləşərək daha əvvəl işğal edilmiş ərazilərin azad edilməsi üçün Azərbaycan Respublikasının ərazi bütövlüyünün müdafiəsinə qalxdılar. Burada biz yenə çiyin-çiyinə dayanmışıq, Qarabağın rus sülhməramlıların müvəqqəti yerləşdiyi ərazisində ekoloqlarımızın monitorinq keçirmələri üçün qanuni haqlarını müdafiə edirik. Bizim tələblərimiz yerinə yetirilməyənə qədər burada olacağıq”.