Sumqayıt şəhərində “2 Fevral – Azərbaycan Gəncləri Günü” münasibətilə tədbir təşkil edilib.

Sumqayit.tv xəbər verir ki, tədbir iştirakçıları əvvəlcə Ulu Öndər Heydər Əliyevin abidəsini və Şəhidlər xiyabanını ziyarət edərək, şəhidlərin əziz xatirəsini ehtiramla yad ediblər.

Bayram tədbiri daha sonra Sumqayıt Musiqi Kollecində davam etdirilib. Burada gənclərin yaradıcılıq bacarıqlarını əks etdirən rəsm və əl işlərindən ibarət sərgi təşkil olunub. Rəsmi hissə Azərbaycan Respublikasının Dövlət Himninin səsləndirilməsi və şəhidlərin xatirəsinin bir dəqiqəlik sükutla yad edilməsi ilə başlayıb.

Sumqayıt şəhər İcra Hakimiyyəti, Abşeron-Xızı Regional Gənclər və İdman İdarəsi, Sumqayıt Musiqi Kolleci və Regional Gənclərin İnkişaf və Karyera Mərkəzinin birgə təşkilatçılığı ilə keçirilən tədbirdə çıxış edən Sumqayıt şəhər icra hakimiyyəti başçısının birinci müavini Teymur Səmədov gənclərin ölkənin gələcəyində mühüm rol oynadığını vurğulayıb. Bildirilib ki, Ulu Öndər Heydər Əliyevin əsasını qoyduğu gənclər siyasəti Prezident İlham Əliyev tərəfindən uğurla davam etdirilir. Qeyd olunub ki, Sumqayıtın 2025-ci il üçün “Gənclər Paytaxtı” elan edilməsi şəhərdə gənclər üçün yeni imkanlar yaradıb.

Abşeron-Xızı Regional Gənclər və İdman İdarəsinin rəisi Telman Kərimov da çıxış edərək, gənclər gününün əhəmiyyətindən və dövlət proqramlarının gənclərin inkişafına verdiyi töhfələrdən danışıb.

Tədbir çərçivəsində “Gənclər Paytaxtı – Sumqayıt” layihəsi və ictimai fəaliyyətlərdə fərqlənən bir qrup gəncə fəxri fərmanlar təqdim olunub.

Bayram proqramı gənclərin hazırladığı bədii-musiqili çıxışlarla davam etdirilib. Tədbir yüksək əhval-ruhiyyə şəraitində başa çatıb.

Bu gün, 15:01 5