Norveçin Stavanger şəhərində yaşayan azərbaycanlı icması Novruz bayramını milli ənənələrə sadiq qalaraq yüksək əhval-ruhiyyə ilə qeyd edib. Doğma torpaqlardan uzaqda yaşamalarına baxmayaraq, soydaşlarımız baharın ab-havasını hiss etdirməyi bacarıb, bayramın ruhunu yaşadıblar.

Sumqayit.tv xəbər verir ki, tədbirə hazırlıq bir neçə gün öncədən başlayıb. İştirakçılar milli şirniyyatlarımızı bişirib, məkanı bəzəyib və zəngin bayram süfrəsi hazırlayıblar. Süfrədə azərbaycanlı xanımların hazırladığı ənənəvi yeməklər, eləcə də şirniyyatlar, qoz-fındıq, quru meyvələr və Novruzun əsas rəmzi olan səməni yer alıb.

Bayram proqramı çərçivəsində ənənəvi oyunlar təşkil olunub. İştirakçılar yumurta döyüşdürmə yarışlarında iştirak edib, hədiyyələr oynanılıb və şən rəqslər edilib. Tədbirin yaddaqalan məqamlarından biri isə milli rəqsimiz “Yallı”nın kollektiv ifası olub.

Uşaqlar üçün də xüsusi əyləncə proqramı təşkil edilib. Tədbirə dəvət olunan fokusçu maraqlı nömrələrlə çıxış edib, uşaqlara şar fiqurları hazırlayıb. Balacalara şirniyyatlar paylanılıb. Proqramın sonunda Bahar qızı uşaqlara hədiyyələr təqdim edib və onların sevinc dolu anları bayrama xüsusi rəng qatıb.

Qeyd edək ki, Norveçdə Novruz bir qədər fərqli qeyd olunsa da, öz mahiyyətini qoruyub saxlayır. "Norveç-Azərbaycan Cəmiyyəti"nin Stavanger şəhəri üzrə şöbəsi (Aserbajdsjansk-Norsk Kulturforeining) tərəfindən hər il təşkil olunan bu bayramlar insanları bir araya gətirir, ümid və birlik mesajı verir. Bu cəmiyyətin əsas məqsədi azərbaycanlıları toplayaraq milli mədəniyyətimizi, bayramlarımızı, adət-ənənələrimizi və dilimizi qoruyub saxlamaq, eləcə də Vətəndən uzaqda böyüyən uşaqlara bu dəyərləri aşılamaqdır. Xatırladaq ki, Cəmiyyətin rəhbəri Sumqayıtlı İradə İsmailidir.

23-03-2026, 14:12 84