“Ağdamdan sonra Füzuli və Zəngilan rayonunda basdırılmış minaların xəritəsinin əldə edilməsi ciddi hadisədir. Bu, Azərbaycan diplomatiyasının uğurudur. Azərbaycan bu istiqamətdə qarşısına qoyduğu hədəflərə nail olmağa başlayır”.

Sumqayit.tv xəbər verir ki, bu sözləri Demokrat.az-a açıqlamasında Milli Məclisin deputatı Fazil Mustafa deyib.

O, növbəti iki rayonun ərazisində basdırılmış minaların xəritəsinin əldə edilməsinin Azərbaycanın uğuru olduğunu bildirib:

“Müharibədən sonrakı dövrdə mina xəritələrinin əldə edilməsi prioritet məsələ hesab olunurdu. Artıq 3 rayon üzrə xəritələr əldə edilib. Azərbaycan diplomatiyası bu istiqamətdə ciddi işlər görüb və nəticə əldə edib. Bölgənin minalardan təmizlənməsi nə qədər tez yekunlaşsa, əhalinin ora köçürülməsi prosesi də erkən başlaya bilər. Bu, Azərbaycanın uğurudur. Ən azından ermənilər də başa düşürlər ki, başqa çıxış yolları yoxdur, bu xəritələri verməlidirlər. Ümid edirik ki, ərazidə basdırılmış minalar xəritələrlə üst-üstə düşəcək. Xəritələrin nə dərəcədə düzgün olduğunu praktikada görəcəyik”.