Abşeron rayonunda baş verən yol-nəqliyyat hadisəsi nəticəsində Özbəkistan vətəndaşının ölümü ilə bağlı cinayət işinə Sumqayıt Ağır Cinayətlər Məhkəməsində baxılıb.

Sumqayit.tv xəbər verir ki, məhkəmənin hökmü ilə 1986-cı il təvəllüdlü Zümrüd Paşayeva 5 il müddətinə azadlıqdan məhrum edilib. Lakin onun himayəsində 6 yaşlı övladının olması nəzərə alınaraq, hökmün icrası uşaq 14 yaşına çatana qədər təxirə salınıb.

Hadisə Abşeron rayonu, Xırdalan şəhərində, “AAF Park” yaşayış kompleksi yaxınlığında baş verib. Qeyri-rəsmi ər-arvad münasibətində olan Zümrüd Paşayeva sevgilisinə məxsus “Mercedes” markalı avtomobili idarə edib. Onun sürücülük vəsiqəsi olmadığı bildirilir.

Avtomobili idarə edərkən Paşayeva Özbəkistan vətəndaşı Viktoriya Qroxotovaya çarpılıb. Qadın ağır xəsarət alıb və 11 gün sonra xəstəxanada dünyasını dəyişib.

Faktla bağlı araşdırmalar başa çatıb, məhkəmə hökmü qanuni qüvvəsini gözləyir.

3-11-2025, 17:40 109