Sumqayıta gedən qadın taksi sürücüsü tərəfindən qarət olunub.

Sumqayit.tv xəbər verir ki, hadisə Abşeron rayonunun Ceyranbatan qəsəbəsi ərazisində baş verib.

Məlumata görə, Abşeron sakini Rafiq Əzizov (ad və soyad şərtidir) “Toyota Prius” markalı avtomobillə taksi fəaliyyəti göstərərkən Bakı şəhərində, “20 Yanvar” metro stansiyasının qarşısında bir xanımı müştəri kimi götürüb. Qadın Sumqayıta, rəfiqəsinin ad gününə getmək istədiyini bildirib.

Onlar Ceyranbatan qəsəbəsinə daxil olarkən qadın mağazaların birinin yanında dayanmağı xahiş edib. Sürücü isə özü mağazaya daxil olaraq tərkibində spirt olan iki enerji içkisi alıb və qadına verib. İçkini qəbul etdikdən sonra qadın özünü pis hiss edib və avtomobili saxlamağı xahiş edib.

Bu zaman Rafiq Əzizov cibindən bıçaq çıxararaq qadından üzərindəki pulu tələb edib. Qadın məcburiyyət qarşısında 640 manat pulu və mobil telefonunu verib. Daha sonra sürücü qadını avtomobildən düşürüb və hadisə yerindən qaçıb.

Araşdırma nəticəsində məlum olub ki, R.Əzizov qadının telefonunu Sumqayıt şəhərində tanışına 50 manata satıb.

Polis əməkdaşlarının keçirdikləri əməliyyatla hadisəni törətməkdə şübhəli bilinən şəxs saxlanılıb.

Faktla bağlı cinayət işi başlanılıb. İş Sumqayıt Ağır Cinayətlər Məhkəməsinə göndərilib. Məhkəmənin hökmü ilə R.Əzizov 8 il müddətinə azadlıqdan məhrum edilib. //Oxu.az

4-11-2025, 15:45 173