Ali Məhkəmədə həyat yoldaşı və 8 aylıq körpəsini öldürməkdə təqsirləndirilən Fərid Hüseynlinin barəsindəki qərardan verilən kassasiya şikayətinin bəzi detalları məlum olub.

Sumqayit.tv xəbər verir ki, hakim Rəşad Abdulovun sədrliyi ilə keçirilən prosesdə elan olunub ki, məhkum kassasiya şikayətində aşağı instansiya məhkəməsinin qərarı ilə razılaşmadığını bildirib.

Qeyd edilib ki, Fərid Hüseynlinin əməli əsassız olaraq Cinayət Məcəlləsinin 120.2.4, 120.2.7 və 120.2.9-cu maddələri ilə tövsif edilib və ona törətdiyi əməllə uzlaşmayan həddindən artıq ağır cəza təyin olunub.

Müdafiə tərəfi məhkumun əməlində qeyd olunan maddələrin tərkib əlamətlərinin olmadığını əsas gətirərək, Sumqayıt Apellyasiya Məhkəməsinin 11 dekabr 2024-cü il tarixli qərarının dəyişdirilməsini, əməlin CM-in 122.2-ci maddəsinə tövsif edilməsini və ya ömürlük azadlıqdan məhrumetmə cəzasının müəyyən müddətə azadlıqdan məhrumetmə cəzası ilə əvəz olunmasını xahiş edib.

Lakin kassasiya instansiyasında işə baxılan zaman Fərid Hüseynli ərizə ilə Ali Məhkəməyə müraciət edərək, müdafiəçisi tərəfindən verilmiş kassasiya şikayətini geri götürdüyünü bildirib.

Məhkəmə kollegiyası ərizəni iş materialları ilə birgə müzakirə edərək, dövlət ittihamçısının rəyini dinlədikdən sonra kassasiya şikayətinin məhkum tərəfindən geri götürüldüyünü nəzərə alıb və həmin şikayətin baxılmadan geri qaytarılması barədə qərar qəbul edib. Bununla da kassasiya müraciəti üzrə icraata xitam verilib.

Qeyd: Hadisə 2023-cü ilin iyununda Abşeron rayonunun Qobu qəsəbəsində qeydə alınıb.

Belə ki, 1993-cü il təvəllüdlü Fərid Firdovsi oğlu Hüseynli 2003-cü il təvəllüdlü həyat yoldaşı Leyla Əlişan qızı İbadovaya və 8 aylıq körpəsinə kəsici-deşici alətlə xəsarət yetirərək öldürməkdə ittiham olunur. Daha sonra o, özünə xəsarət yetirib və xəstəxanaya yerləşdirilib.

Ona qarşı Cinayət Məcəlləsinin 120.2.4 (xüsusi amansızlıqla qəsdən adam öldürmə), 120.2.7-ci (iki və ya daha çox şəxsi öldürmə), 120.2.9-cu (təqsirkar şəxs üçün aşkar surətdə köməksiz vəziyyətdə olan adamı öldürmə) maddələri ilə ittiham irəli sürülüb.

Sumqayıt Ağır Cinayətlər Məhkəməsinin hökmü ilə Fərid Hüseynli ömürlük azadlıqdan məhrum edilib. Sumqayıt Apellyasiya Məhkəməsinin qərarına əsasən, şikayət təmin edilməyib.

L.Hüseynli Bakı Dövlət Universitetinin Biologiya fakültəsinin III kurs tələbəsi olub. /Pravda.az

24-12-2025, 11:05 42