Sumqayıt Şəhər Məhkəməsində qəsdən sağlamlığa az ağır zərər vurmada təqsirləndirilən İslam Muradovun (adı, soyadı şərtidir) cinayət işi üzrə məhkəmə istintaqı başa çatıb.

Sumqayit.tv xəbər verir ki, pravda.az-ın əldə etdiyi məlumata görə, hakim Günel İsmayılovanın sədrliyi ilə keçirilən prosesdə hökm oxunub.

Məhkəmənin hökmü ilə cinayət təqibinə xitam verilib və təqsirləndirilən şəxs cinayət məsuliyyətindən azad edilib. Onun barəsində seçilmiş başqa yerə getməmək barədə iltizam qətimkan tədbiri ləğv olunub.
 

İttihama görə, İslam Muradov qardaşı, zərərçəkmiş İlqar Muradovun (adı, soyadı şərtidir) sağlamlığının uzun müddətə pozulmasına səbəb olmuş qəsdən sağlamlığa az ağır zərər yetirib.
 

Belə ki, 09 iyun 2025-ci il tarixdə, saat 16:00 radələrində Sumqayıt şəhəri, 13-cü mikrorayonunda yerləşən mənzilin dəhlizində tərəflər arasında şəxsi münasibətlər zəminində mübahisə baş verib. Buna səbəb İslam Muradovun digər qardaşı zərərçəkmiş şəxsin arvadının zəng vurub mübahisə etməsi olub.

İstintaqla müəyyən edilib ki, yaranmış mübahisə zamanı təqsirləndirilən şəxs yumruq zərbələri ilə İlqarın üz nahiyəsinə qəsdən zərbələr endirib. Nəticədə zərərçəkmiş şəxsə sağ gözaltı nahiyənin sıyrığı kimi dərəcəsi təyin edilməyən xəsarət, qapalı kəllə-beyin travması, baş-beyin silkələnməsi, sağ paraorbital nahiyənin hematoması kimi sağlamlığın qısa müddətə pozulmasına səbəb olan yüngül bədən xəsarətləri yetirilib.

Bundan əlavə, zərərçəkmiş şəxsə alt çənə sümüyünün sol şaxəsinin və sol maksilyar sinus divarının yerdəyişməyən sınığı, burun sümüyünün burunla tənəffüsü pozan sınığı kimi xəsarətlər yetirilib.

Eyni zamanda, İslam tərəfindən zərərçəkmiş şəxsə təpiklə sol böyür nahiyəsinə zərbə endirilməsi nəticəsində solda VI–VII qabırğaların xətti sınığı kimi xəsarətlər yetirilib.
 

Məhkəmədə İlqar qardaşından şikayətçi olmadığını bildirib.

Dünən, 15:16 9