Bakı şəhərində yerləşən “İdrak” liseyində baş verən silahlı insident cəmiyyətə ciddi narahatlıq yaradıb.

Sumqayit.tv Unikal-a istinadən verdiyi məlumata görə, hadisə paytaxtın Binəqədi rayonu ərazisində fəaliyyət göstərən təhsil müəssisəsində qeydə alınıb. Belə ki, liseyin 10-cu sinif şagirdi müəllimə silahdan atəş açıb.

Xəsarət alan müəllim dərhal Kliniki Tibbi Mərkəzə (KTM) yerləşdirilib. Onun vəziyyətinin ağır olduğu bildirilir.

Liseyin direktoru Mönsüm Alışov hadisənin ehtiyatsızlıqdan baş verdiyini açıqlayıb. Onun sözlərinə görə, şagird ov tüfəngini məktəb çantasında liseyə gətirib və insident sinif otağında qeydə alınıb. Direktor həmçinin bildirib ki, müəllimin vəziyyəti hazırda stabildir.

Hadisə ilə bağlı yeni detallar da üzə çıxıb. “Qafqazinfo”nun əldə etdiyi məlumata görə, müəllimi güllələməkdə şübhəli bilinən şagirdin atası Samir Şirinov daha əvvəl Sumqayıt Şəhər İcra Hakimiyyətinin Mənzil Kommunal Təsərrüfat Birliyində rəis müavini vəzifəsində çalışıb. Onun hazırda işsiz olduğu bildirilir.

Yeniyetmə saxlanılıb, faktla bağlı hüquq-mühafizə orqanları tərəfindən araşdırmalar davam etdirilir.

6-02-2026, 12:02 251