Sumqayıt şəhərində iki qadın arasında yaranan mübahisə sonda cinayət hadisəsi ilə nəticələnib.

Sumqayit.tv Teleqraf.az-a istinadən xəbər verir ki, hadisə şəhərin 76-cı məhəlləsində yerləşən 5 nömrəli yataqxanada baş verib. 1980-ci il təvəllüdlü Səidə Səlimova ümumi dəhlizdə qonşusu ilə mübahisə zamanı onun əlindən tutaraq burub və nəticədə zərərçəkmiş şəxsin barmağı sınıb.

Məlumata görə, mübahisə şəxsi münasibətlər zəminində yaranıb. Təqsirləndirilən şəxs ifadəsində bildirib ki, qonşusu dəhlizdə qoyulan ayaqqabı dolabına etiraz etdikdən sonra aralarında mübahisə düşüb və əsəbiləşərək onun əlini burub. Hadisə nəticəsində zərərçəkmiş şəxs xəsarət alıb və hüquq-mühafizə orqanlarına müraciət edib.

Faktla bağlı Səidə Səlimovaya Cinayət Məcəlləsinin 127.1-ci maddəsi ilə ittiham elan olunub. O, məhkəmədə özünü təqsirli bildiyini və etdiyinə görə peşman olduğunu deyib.

Sumqayıt Şəhər Məhkəməsinin hökmü ilə təqsirləndirilən şəxsə 6 ay müddətinə azadlığın məhdudlaşdırılması cəzası verilib. Qərara əsasən, onun gecə saatlarında yaşayış yerini tərk etməsi, həmçinin Sumqayıt, Bakı və Abşeron ərazisini icazəsiz tərk etməsi qadağan olunub.

Bundan əlavə, təqsirləndirilən şəxs elektron nəzarət vasitəsi daşımalı, yaşayış yerini dəyişdirməməli və kütləvi tədbirlərdə iştirak etməməlidir.

20-03-2026, 23:00 45