Vətən müharibəsinin başlandığı ilk gün şəhidlik zirvəsinə ucalan Rzayev Tərlan və Xələfli Mahirin anım günü keçiriləcək.

Sumqayit.tv xəbər verir ki, anım günü bu gün Şəhidlər Xiyabanında başlayacaq, daha sonra isə şəhidlərimizin yaşadıqları ünvanda davam edəcək. Qeyd edək ki, Tərlan Rövşad oğlu Rzayev 2001-ci il mayın 21-də Sumqayıt şəhərində anadan olub. Azərbaycan Ordusunun əsgəri olan Tərlan Rzayev 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Füzulinin azadlığı uğrunda gedən döyüşlərdə savaşan zaman şəhid olub.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli sərəncamına əsasən Tərlan Rzayev ölümündən sonra "Vətən uğrunda", 25.12.2020-ci il tarixli sərəncamına əsasən "Füzulinin azad olunmasına görə" medalları ilə təltif edilib.

Mahir Muxtar oğlu Xələfli, 8 aprel 2001-ci ildə Sumqayıt şəhərində anadan olmuşdur.  Əslən Qubadlı rayonunun Qiyaslı kəndindən olan Mahir Azərbaycan Silahlı Qüvvələrinin sıralarında müddətli həqiqi hərbi xidmət qulluqçusu olmuşdur. Gəncədə və Daşkəsən rayonunda yerləşən "N" saylı hərbi hissədə xidmət etmişdir.
Azərbaycan Ordusunun əsgəri olan Mahir Xələfli 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsində iştirak etmişdir. Murovdağın azadlığı uğrunda gedən döyüşlərdə vuruşmuşdur. Mahir Xələfli 27 sentyabr 2020-ci ildə Murovdağ istiqamətində döyüş tapşırığının yerinə yetirilməsi zamanı həlak olmuşdur. O Sumqayıt Şəhidlər Xiyabanında dəfn olunmuşdur. Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli sərəncamına əsasən Mahir Xələfli ölümündən sonra "Vətən uğrunda", 29.12.2020-ci il tarixli sərəncamına əsasən "Kəlbəcərin azad olunmasına görə", 30.12.2020-ci il tarixli sərəncamına əsasən "Hərbi xidmətlərə görə" medalları ilə təltif edilmişdir. 

Allah ruhlarını şad etsin.
Unutmayaq, unutdurmayaq!