Şəhidimiz Nuruzadə Nurlan Tofiq oğlunun anım mərasimi qeyd olunub. 
Sumqayit.tv məlumat verir ki, İlk olaraq mərasim iştirakçıları Şəhidlər Xiyabanını ziyarət edib şəhidimizlə xatirə rəsimləri çəkdiriblər. Tədbirdə İcra hakimiyyəti nümayəndələri, şəhid ailələri, qohumlar, qazilər iştirak edib. Daha sonra tədbir mərasim evində davam edib. Şəhidin adına ehsan süfrəsi verilib. 
Qeyd edək ki, Nurlan Nuruzadə 9 avqust 2001-ci ildə Sumqayıt şəhərində anadan olub. Sumqayıt şəhər 17 nömrəli tam orta məktəbdə təhsil alıb. O 2019-cu ilin oktyabrından Azərbaycan Silahlı Qüvvələrinin sıralarında müddətli həqiqi hərbi xidmət qulluqçusu idi. Xidmətə Ağcabədi rayonunda başlayan Nurlan xidmətini Beyləqan rayonunda yerləşən "N" saylı hərbi hissədə xidmətini davam edib. Azərbaycan Ordusunun əsgəri olan Nurlan Nuruzadə 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsində topçu olaraq iştirak edib və Füzulinin azadlığı uğrunda gedən döyüşlərdə vuruşmuşdur. Nurlan Nuruzadə 1 oktyabr 2020-ci ildə Füzuli rayonu istiqamətində döyüş tapşırığının yerinə yetirilməsi zamanı həlak olub, Sumqayıt Şəhidlər Xiyabanında dəfn olunmuşdur.
Allah rəhmət eləsin!

Müxbir Vəsiqə Dadaşova