Sumqayıt Regional Mədəniyyət İdarəsinə tabeli Mərkəzləşdirilmiş Kitabxana Sisteminin M.Ə.Rəsulzadə adına Kitabxana filialının əməkdaşları şəhid Əbil Qadir oğlu Cəbizadənin ailəsini ziyarət edərək, ailənin qayğıları ilə maraqlanıb, maddi və mənəvi dəstək olublar.

Sumqayit.tv xəbər verir ki, şəhidin anası İradə xanım oğlu haqqında danışaraq bildirib ki, Əbil ali təhsilli iqtisadçı olub. Universiteti bitirdikdən sonra şəhidimiz hərbi xidmətə yollanıb. Silahla mükəmməl davranışına görə baş atıcı vəzifəsinə təyin olunub. Qəhrəmanımız Aprel döyüşlərində də iştirak edib, döyüş tapşırıqlarını böyük uğurla yerinə yetirib. Döyüşlərdə göstərdiyi şücaətə görə o, dəfələrlə fəxri fərman və təşəkkürnamələrlə təltif edilib, 2016-cı ilin oktyabr ayında hərbi xidmətini başa vurub. Vətən müharibəsində yenidən cəbhəyə yollanıb. Füzuli, Cəbrayıl və Xocavəndin düşməndən azad edilməsində fəal iştirak edib. Xocavənd rayonunun Zoğalbulaq kəndinin azadlığı uğrunda gedən döyüşlərdə qəhrəmancasına vuruşaraq, 14 oktyabr 2020-ci il tarixində şəhid olub. Azərbaycan Respublikasının Prezidenti cənab İlham Əliyevin 15.12.2020-ci il tarixli Sərəncamına əsasən Əbil Cəbizadə ölümündən sonra "Vətən uğrunda”, 24.12.2020-ci il tarixli Sərəncamına əsasən isə "Cəbrayılın azad olunmasına görə” medalları ilə təltif edilib.