Bu gün ( red-dünən) 27.09.2020-ci ildə başlayan Vətən müharibəsi zamanı şəhid olan Azərbaycan Silahlı Qüvvələrinin əsgəri, "Şuşa qartalı" ləqəbli Əliyev Qubad Hüsür oğlunun şəhadətə ucaldığı gündür. Sumqayit.tv xəbər verir ki, şəhidimizin anım mərasimi Şəhidlər Xiyabanında məzarını ziyarət edilərək başlayıb, sonra isə mərasim evlərinin birində ehsan süfrəsi verilərək davam edib. Tədbir şəhidlərimizin ruhlarına 1 dəqiqəlik sükutla və Azərbaycan Respublikasının Himni ilə başlayıb. Mərasimdə İcra Hakimiyyətinin nümayəndələri, 1, 8, 13, 11 nömrəli məktəblərin müəllim kollektivi, 2 saylı Uşaq və Gənclər inkişaf mərkəzinin və 19 nömrəli məktəbin müəllim kollektivi və şagirdləri, Kotec qəsəbəsi “İmam Sadiq” məscidinin axundu Mirfəyyaz Fəttayev, Corat məscidinin axundları Hacı Rauf Məhərrəmov və Hacı Sahib Məmmədov, Sumqayıt sukanal idarəsinin rəisi Xalid Quluzadə, Post patul işçiləri, qohumlar və şəhid ailələri iştirak ediblər. 
Xatırladaq ki,  Əliyev Qubad Hüsür oğlu 04.02.1994-cü ildə Sumqayıt şəhərində anadan olub. 2001-ci ildə Sumqayıt şəhər 8 nömrəli orta məktəbdə 1-ci sinifə gedib. 2010-cu ildə orta məktəbi bitirib, Sumqayıt şəhər 1 nömrəli Peşə Liseyində təhsilini davam etdirib.
Qubad 2013-cü ildə hərbi xidmətə çağırılıb və Ağdam rayonu 190 saylı  hərbi hissənin əsgəri olub. Hərbi xidməti başa vurduqda baş atıcı və tuşlayıcı vəzifəsində xidmətə layiq görülüb.
Şəhidimiz hərbi xidmətdən qayıtdıqdan sonra “Delta Qrup CO” MMC-də Logistika Departamentinin Mərkəzi Anbar şöbəsində fəhlə işləyib. Qəhrəmanımız 27.09.2020-ci il tarixində İkinci Qarabağ Müharibəsi başlayandan 11 gün sonra, oktyabrın 9-da Vətənənin müdafiəsinə çağırılıb. 
Qubad cəbhə bölgəsinin Qubadlı, Ağdərə, Xocavənd istiqamətində gedən ağır döyüşlərdə öz xüsusi bacarığı ilə seçilən qəhrəmanlardan biri olub. Qubad noyabrın 8-i saat 13 radələrində anasına zəng edərək deyib:
"Ana, bizi təbrik edə bilərsən. Biz artıq Şuşadayıq. İllər sonra Şuşanı azad etdik".
Şuşa xəbərini anasına çatdıran Qubad telefon danışığından 2 saat sonra Şuşa yüksəkliyində qəhrəmancasına şəhidlik məqamına ucalıb. 
Azərbaycan Prezidenti İlham Əliyevin Sərəncamına əsasən Qubad Əliyev ölümündən sonra  "Füzulinin azad olunmasına görə", "Xocavəndin azad olunmasına görə", "Cəbrayılın azad olunmasına görə" və "Vətən uğrunda" medalları ilə təltif olunub. 
Allah ruhunu şad etsin, Şuşa Qartalı! 

Müxbir:Vəsiqə DADAŞOVA