Sumqayit.tv xəbər verir ki, bu barədə təyyarəni istehsal edən TUSA aerokosmik dövlət korporasiyasının baş direktoru Temel Kotil məlumat verib: “Kaan statik və möhkəmlik testlərindən uğurla keçdi. Daxili avadanlıqların quraşdırılması davam edir. Uçuş üçün lazım olan eniş şassiləri tezliklə quraşdırılacaq. Onun ilin sonuna qədər havaya qalxacağını gözləyirik".
"Yeni Şafak" qəzeti Kotilə istinadən yazır ki, dekabrın əvvəlində qırıcının yerdə tam uçuşa hazırlıq sınaqlarının keçirilməsi planlaşdırılır. Bundan sonra növbəti mərhələ uçuş olacaq.
Kotil qeyd edib ki, Kaan “performans baxımından ABŞ, Çin və Rusiyada xidmətdə olan təyyarələrə bərabərdir”: "Avropalıların belə bir təyyarəsi yoxdur. Yaponiya və Cənubi Koreya öz qırıcılarını yaradıblar, lakin bu sinifdən deyil. Deməli, Kaan Türkiyənin strateji sərvətidir. Bu, çox böyük bir təyyarədir. Əgər biz onu havada saxlaya bilsək, qalan sistemləri təkmilləşdirəcəyik”. TUSA-nın baş direktorunun sözlərinə görə, hazırda yalnız ejektor oturacağı və mühərrik xaricdən gətirilir, lakin təyyarə orduya təhvil verilənə qədər onlar da yerli istehsalla əvəz olunacaq.
Kotil onu da qeyd edib ki, Kaan istehsalı Türkiyəyə, eləcə də onun dost ölkələrinə Türkiyənin istehsal proqramından çıxarılan Amerika F-35 səviyyəli təyyarələr təqdim edəcək. Onun sözlərinə görə, F-35 hələ Türkiyə və ya ona dost olan heç bir müsəlman ölkəsinə təqdim edilməyib. Bu baxımdan, Kaan bu dövlətlərin hava qüvvələri donanmasını doldurmaq üçün əsas variantlardan birinə çevrilə bilər.
Qeyd edək ki, “Kaan” qırıcısı 2017-ci ildən Türkiyədə Milli Döyüş Təyyarələri proqramı çərçivəsində yaradılıb. Onun kütləvi istehsalına 2028-ci ildə başlanacağı planlaşdırılır. Türkiyə rəsmiləri daha əvvəl bəyan etmişdilər ki, Kaan taktiki və texniki xüsusiyyətlərinə görə Amerikanın F-35-lərini keçəcək və gələcəkdə respublikanın Hərbi Hava Qüvvələrində xidmətdə olan F-16 qırıcılarını əvəz edəcək.