“Sonuncu turda uduzsam da, dünya çempionuyam və bu, mənim uşaqlıq arzum idi”.

Sumqayit.tv xəbər verir ki, bu sözləri 20 yaşlılar arasında çempion olan ilk qadın şahmatçımız Gövhər Beydullayeva deyib.

Xanım şahmatçımız bildirib ki, 10-cu turda oyunun gedişində öndə olsa da, uduş vəziyyətini əldən verib: “Alınmadı və heç-heçə oynadım, amma buna baxmayaraq, bir tur əvvəldən çempionluğu təmin etdim”.

Gənc qrossmeyster daha əvvəl onlayn formatda dünya çempionu olsa da, ilk dəfə klassik şahmatda bu uğuru qazandığını vurğulayıb: “Mənə dəstək olan hər kəsə təşəkkür edirəm. Burada çempion olduğum üçün Dünya Kubokuna vəsiqə qazandım. O yarışda da Azərbaycanı layiqincə təmsil etmək istəyirəm. Həmçinin qadınlar arasında da dünya çempionatında iştirak etmək arzum var. Azərbaycana 20 yaşa qədər qadınlar arasında qızıl medalı gətirən ilk şahmatçı olduğum üçün çox sevincliyəm”.

Dünya çempionluğunun heç bir başqa uğurla müqayisə olunmadığını vurğulayan Beydullayeva bunun xüsusi duyğu olduğunu deyib: “Mən Avropa çempionu da olmuşdum, amma bu, tam başqadır”.

Nihat KƏRİMLİ

23-10-2022, 23:41 103