"Turan Tovuz" Premyer Liqada növbəti qələbəsini dünən qazandı.

Doğma meydanda "Sumqayıt"ı qəbul edən bölgə klubu 88-ci dəqiqədə Şəhriyar Əliyevin vurduğu qolla 3 xalı əldə etməyi bacardı.

Kapitanın qoluna ən çılğın sevinən isə baş məşqçi Ayxan Abbasov oldu. Gənc mütəxəssis qarşılaşmadan sonra mətbuat konfransında bunun səbəbini belə izah edib:

"Mən ümumən hər qola çox sevinirəm. Amma onu da deyim ki, bu qol bəzi adamlara ismarıc idi. Öz mesajlarını aldılar".

Təbii ki, Abbasovun mesajının ünvanı sabiq komandası olan "kimyaçılar"ın rəhbərliyinədir.

Və onun göndərdiyi mesaja cavab çox keçmədən Futbolun İnkişaf Fondunun (FİF) Himayəçilər Şurasının üzvü Şaiq Qəribzadədən gəlib.

"Sumqayıt"ın prezidenti Riad Rəfiyevin yaxın dostu kimi tanınan Şaiq bəy öz sosial şəbəkə hesabından bu sözləri yazıb:

"Sumqayıt FK, hər futbol klubunun ağır günləri olur. Bu, problem deyil, hər şey irəlidədir. Bir-iki xal yığan, keçmiş uğurlarını kimə görə qazanan adamlara isə demək istəyirəm ki, mövsüm hələ bitməyib".

///sportinfo.az