Sumqayıtda “Azercell”in dəstəyi ilə Uşaq Paralimpiya Oyunları keçirilib.

Sumqayit.tv xəbər verir ki, Azərbaycan Respublikası Milli Paralimpiya Komitəsinin təşkilatçılığı, Gənclər və İdman Nazirliyinin dəstəyi və “Azercell Telekom” MMC-nin tərəfdaşlığı ilə Sumqayıt Paralimpiya İdman Kompleksində növbəti Uşaq Paralimpiya Oyunları baş tutub.

Bu il oyunlar daha geniş miqyasda keçirilib. 8 idman növü üzrə 130 uşaq paralimpiyaçı iştirak edib. Yarışlar paracüdo, parastolüstü tennis, parataekvondo, paraüzgüçülük, parapauerliftinq, parabadminton, parakamandan oxatma və boccia üzrə müxtəlif kateqoriyalarda təşkil olunub. Sonda qaliblər mükafatlandırılıb.

Oyunların əsas məqsədi inklüziv idmanın inkişafına dəstək vermək, sağlamlıq imkanları məhdud uşaqların potensialını reallaşdırmaq və yeni paralimpiyaçı nəslinin yetişdirilməsinə töhfə verməkdir.

“Azercell Telekom” MMC 2014-cü ildən etibarən Uşaq Paralimpiya Hərəkatını dəstəkləyir. Şirkətin dəstəyi sayəsində yüzlərlə uşaq idmanla məşğul olmaq imkanı əldə edib, onların fiziki, psixoloji və sosial inkişafına müsbət təsir göstərilib.

23-12-2025, 17:36 27