“Sumqayıt” klubunun ukraynalı futbolçusu Danilo Beskorovaynıy komandasının son oyunlardakı nəticələri ilə bağlı fikirlərini bölüşüb.

Sumqayit.tv xəbər verir ki, futbolçu açıqlamasında bəzi qarşılaşmalarda məğlubiyyətə layiq olmadıqlarını bildirib.

Onun sözlərinə görə, uğursuz nəticələrin əsas səbəblərindən biri psixoloji amildir:“Avrokuboklara vəsiqə qazanmaq istəyirik və turnir cədvəlində bizə yaxın komandalar çoxdur. Elə oyunlar olub ki, məğlubiyyətə layiq deyildik. Amma istədiyimiz nəticəni əldə edə bilmədik. Son matçlarda eniş yaşayırıq və bu vəziyyətdən çıxmaq üçün daha da birləşməliyik.”

27 yaşlı müdafiəçi növbəti turda keçiriləcək “Sumqayıt” – “Şamaxı” oyunu barədə də danışıb:“Hər oyuna qələbə üçün çıxırıq. Hazırda kiçik bir böhran yaşayırıq. Ümid edirəm ki, ‘Şamaxı’ya qarşı oyunda azarkeşlərimizi qələbə ilə sevindirə biləcəyik.”

Yanvarda komandaya qoşulan futbolçu klubda özünü rahat hiss etdiyini də qeyd edib:“Heyətdə perspektivli oyunçular çoxdur. Komandada hamı məni yaxşı qarşıladı. Sumqayıt şəhəri də xoşuma gəlir, uyğunlaşma problemim olmadı.”

Qeyd edək ki, “Sumqayıt” hazırda Misli Premyer Liqasında 23 turdan sonra 32 xalla 6-cı pillədə qərarlaşıb

12-03-2026, 21:02 39