Yaxın 3 ildə Türkiyə Əlcəzairdən ildə 4,4 milyard kubmetr maye qaz – LNG almağa davam edəcək.
Sumqayit.tv xəbər verir ki, bunu Türkiyənin enerji və təbii ehtiyatlar naziri Alparslan Bayraktar X sosial şəbəkəsində (keçmiş Twitter) yazıb: “BOTAŞ ilə Əlcəzairin milli neft və qaz şirkəti Sonatrach arasında imzalanan müqavilə ilə biz 1988-ci ildən qüvvədə olan ikitərəfli LNG idxalı müqavilələrini daha üç il müddətinə uzatdıq. Bu müddətdə Türkiyə hər il 4,4 milyard kubmetr LNG almağa davam edəcək”.
Bayraktar qeyd edib ki, “bu tarixi razılaşmanın uzadılması qərarı ölkələr arasında köklü əməkdaşlığı daha da gücləndirəcək”. Razılaşmalar Türkiyə Prezidenti Rəcəb Tayyib Ərdoğanın Yüksək Səviyyəli Əməkdaşlıq Şurasının iclasının keçirildiyi Əlcəzairə səfəri zamanı bağlanıb.
Türkiyə 2022-ci ildə təxminən 10 milyard kubmetr maye qaz alıb. Eyni zamanda ölkə qəbul etdiyi boru kəməri qazına münasibətdə spot bazarda və uzunmüddətli müqavilələr üzrə alınan LNG-nin payını artırmağa çalışır.