Fərdi sahibkarların sosial sığorta haqlarının mövcud dərəcələrlə hesablanması müddəti 1 yanvar 2026-cı il tarixdə bitir. İqtisadiyyat Nazirliyi yanında Dövlət Vergi Xidmətindən bildirilib ki, bundan irəli gələrək “Sosial sığorta haqqında” Qanuna dəyişiklik edilməsi təklif olunur. Növbəti ildən qanunvericiliyə dəyişiklik edilməyəcəyi halda fəaliyyət göstərdikləri sahələrdən asılı olaraq fərdi sahibkarların sosial sığorta yükü artmalı idi. Lakin “Sosial sığorta haqqında” Qanuna təklif edilən dəyişikliyə əsasən, fərdi sahibkarlar gələn ildən sosial sığorta haqlarını dövriyyədən 2% dərəcə ilə ödəyəcəklər. Bu zaman sığorta haqqının minimum məbləğ həddi minimum əmək haqqının 15 faizi, yəni 60 manat, maksimum məbləğ həddi isə minimum əmək haqqının 1 misli, yəni 400 manat təşkil edəcək.
Sumqayit.tv xəbər verir ki, İqtisadçı Eyyub Kərimli Pravda.az-a açıqlamasında dəyişiklikləri müsbət hal kimi qiymətləndirib:
“Əvvəllər fərdi sahibkarlar yalnız vahid tarif üzrə minimum əmək haqqına bağlı müəyyən ödənişlər ödəyirdilər. Bu da hesab edirəm ki, müəyyən ədalətsizliyə səbəb olurdu. Çünki bəzən daha çox dövriyyəsi olan sahibkarlar daha az Sosial Müdafiə Fonduna köçürmələr edirdilər. Dövriyyəsi az olan sahibkarlar isə eyni qaydada digər sahibkarlarla bərabər Sosial Müdafiə Fonduna eyni məbləğdə vəsait ödəyirdilər. Bu da sözsüz müəyyən uyğunsuzluqlar yaradırdı. Bu baxımdan bu istiqamətdə təklif olunan dəyişikliklər daha ədalətli yanaşmadır. Dövriyyəyə uyğun olaraq, həm regionlarda, həm Bakıda Sosial Müdafiə Fonduna köçürmələr həyata keçiriləcək. Hesab edirəm bu kiçik və mikro sahibkarın fəaliyyətinə daha müsbət təsir göstərəcək. Hər bir sahibkar öz dövriyyəsinə, öz gəlirlərinə uyğun Sosial Müdafiə Fonduna ödənişlər həyata keçirəcək. Bu da digər tərəfdən kiçik sahibkarların vergi yükünün azalmasına müsbət təsir göstərə bilər. Bununla yanaşı regionlarda da fəaliyyət göstərən sahibkarların vergi yükünün dəqiq tənzimlənməsinə təsir göstərəcək”.
Qeyd: Mövcud qanuna əsasən, fərdi sahibkarlar özünə görə minimum aylıq əməkhaqqının tikinti sahəsində 50 faizi, digər sahələrdə (yəni ticarət, iaşə, tərcümə, mühasibat və s. xidmət sahələri) 25 faizi miqdarında sosial sığorta haqları ödəyirlər. Həmçinin regionlar üzrə əmsallar tətbiq edilir (Bakı şəhərində 100 faiz, Sumqayıt və Gəncə şəhərlərində 90 faiz, digər şəhərlərdə 80 faiz, rayon inzibati ərazi vahidlərinin inzibati mərkəzi olan inzibati ərazi vahidlərində və qəsəbələrdə 60 faiz, kənd yerlərində 50 faiz miqdarında).
1-12-2025, 22:30
53
