Asiya İnkişaf Bankı (ADB) Abşeron dairəvi dəmir yolu xəttinin yenidən qurulması ilə bağlı texniki yardıma başlayıb.

Sumqayit.tv xəbər verir ki, layihə çərçivəsində Xüsusi Texniki Yardım Fondu vasitəsilə 225 min ABŞ dolları məbləğində maliyyələşdirmənin ayrılması nəzərdə tutulur. ADB-nin məlumatına görə, bank Azərbaycan tərəfinin müraciəti əsasında infrastrukturun planlaşdırılması ilə bağlı mövcud sənədlərin təhlilinə ekspert dəstəyi göstərəcək, eləcə də metro və avtobus sistemləri ilə inteqrasiyanın təmin olunması, şəhər və sənaye zonalarında nəqliyyatın əlaqələndirilməsi istiqamətində məsləhətlər verəcək. Bununla yanaşı, sərnişin qatarlarının alınması üçün tender sənədlərinin nəzərdən keçirilməsi də texniki yardım paketinə daxildir.

Bankın dəstəyi Abşeron dairəvi xəttinin müasir tələblərə uyğunlaşdırılması, daha səmərəli və təhlükəsiz sərnişindaşımanın təmin edilməsi baxımından mühüm əhəmiyyət kəsb edir. Texniki yardım çərçivəsində “Azərbaycan Dəmir Yolları” QSC-nin baş plan layihəsinin təhlili tamamlanacaq, tikinti və yenidənqurma üzrə planlaşdırma işləri aparılacaq. Yardımın ilkin başa çatma tarixi 2026-cı il noyabrın 30-u olaraq müəyyən edilib.

Abşeron dairəvi dəmir yolu xətti Bakıdan Sumqayıta iki marşrut üzrə fəaliyyət göstərir və yarımadanın bir çox sərnişin stansiyalarını birləşdirir. Son illərdə xətt üzrə mərhələli şəkildə geniş yenidənqurma işləri aparılıb: 2015-ci ildə Bakı–Biləcəri–Sumqayıt xəttinin yenilənməsi, 2019-cu ildə Bakı–Sabunçu və Sabunçu–Pirşağı xətlərinin modernləşdirilməsi, 2020-ci ildə isə Pirşağı–Goradil–Novxanı–Sumqayıt sahəsinin yenidən qurulması başa çatıb. Hazırda “Dərnəgül” stansiyasının tikintisi davam edir və bu stansiyanın dörd platforma və iki turniket pavilyonu ilə istifadəyə verilməsi planlaşdırılır.

Azərbaycan 1999-cu ildən ADB-nin üzvüdür və bu müddət ərzində bank ölkəyə ümumilikdə 5,6 milyard ABŞ dolları məbləğində investisiya yatırıb. Bunun 4,4 milyard dolları dövlət, 1,2 milyard dolları isə özəl sektora yönəldilib. Nəqliyyat və enerji sahələri ADB tərəfindən ən çox maliyyələşdirilən istiqamətlər olaraq qalır. Yeni tərəfdaşlıq strategiyasına əsasən, bank Azərbaycana 2,5 milyard dollara qədər əlavə sərmayə ayırmağa hazırdır.

Abşeron dairəvi xəttinin yenidən qurulması üzrə texniki yardım ölkənin dəmir yolu infrastrukturunun daha da təkmilləşdirilməsi, sərnişin daşımalarında rahatlığın və xidmət keyfiyyətinin artırılması baxımından əhəmiyyətli addım kimi qiymətləndirilir.

12-12-2025, 14:29 21