2025-ci ilin yanvar-noyabr aylarında Sumqayıt şəhərində əsas kapitala yönəldilən investisiyaların həcmi ötən ilin eyni dövrü ilə müqayisədə nəzərəçarpacaq dərəcədə artıb.
Sumqayit.tv xəbər verir ki, rəsmi statistikaya əsasən, bu dövrdə ölkə üzrə qeyri neft-qaz sektoruna yatırılan sərmayələrin yüksəlməsi Sumqayıtın sənaye və istehsal potensialına da müsbət təsir göstərib.

Hesabat məlumatlarına görə, cari ildə Sumqayıtda bir sıra mühüm sosial və istehsal təyinatlı obyektlər istifadəyə verilib. Şəhərdə tikinti kimyəvilərinin istehsalı zavodu, eləcə də yük və xüsusi təyinatlı avtomobil istehsalı müəssisəsinin işə düşməsi regionun sənaye imkanlarının genişləndirilməsi baxımından mühüm addım hesab olunur. Bu obyektlərin fəaliyyətə başlaması həm yeni iş yerlərinin yaradılmasına, həm də yerli istehsalın şaxələndirilməsinə şərait yaradıb.

Sumqayıt sənaye zonaları və mövcud infrastruktur imkanları sayəsində xarici sərmayədarlar üçün cəlbedici ərazi olaraq qalır. Ümumilikdə 2025-ci ilin 11 ayı ərzində Azərbaycana daxil olan xarici investisiyaların 31 faizdən çox artması fonunda, bu kapital axınının əhəmiyyətli hissəsinin sənaye yönümlü regionlara, o cümlədən Sumqayıta yönəlməsi şəhərin iqtisadi inkişaf dinamikasını gücləndirir.

İnvestisiya siyasətinin prioritet istiqaməti kimi çıxış edən qeyri neft-qaz sektorunun inkişafı Sumqayıtda aparılan tikinti-quraşdırma işlərinin həcmini artırıb. Şəhərdə yeni istehsal sahələrinin qurulması, müasir texnologiyaların tətbiqi və müəssisələrin fəaliyyətə verilməsi 2025-ci ilin iqtisadi mənzərəsində Sumqayıtın rolunu daha da gücləndirib.

Hazırda şəhərdə sənaye, logistika və tikinti sahələrində həyata keçirilən layihələr investisiya axınının davamlı olmasını təmin edir və regionun iqtisadiyyatına uzunmüddətli perspektivdə əlavə dəyər qatır.

15-12-2025, 11:52 31