Elm və Təhsil Nazirliyinin Təsərrüfat Hesablı Əsaslı Tikinti və Təchizat İdarəsi 2026-cı il ərzində təhsil müəssisələrində mühafizə xidmətinin təşkili məqsədilə iki ayrı tender elan edib.

Sumqayit.tv xəbər verir ki, tenderlərdən birinin ehtimal olunan qiyməti 1 milyon 752 min 200 manat, digərinin isə 7 milyon 522 min 918 manat 57 qəpik təşkil edir.

Birinci tender çərçivəsində Bakı şəhərində yerləşən bir sıra təhsil və sosial təyinatlı müəssisələrdə stasionar mühafizə xidmətinin göstərilməsi nəzərdə tutulur. Bu siyahıya Bakı Slavyan Universitetinin nəzdində fəaliyyət göstərən məktəb-lisey kompleksi, Bakı şəhərində yerləşən 2, 4, 6 və 12 nömrəli internat tipli xüsusi ümumtəhsil məktəbləri, eləcə də 2 nömrəli Uşaq-Gənclər İnkişaf Mərkəzi daxildir. Obyektlər üzrə mühafizə postlarının sayı fərqlənir, xidmətlər əsasən istirahətsiz rejimdə, bəzi hallarda isə 24 saatlıq əsasda təşkil olunacaq. Xidmət müddəti 10.5 ay olaraq müəyyən edilib.

İkinci tender isə regionlarda və iri təhsil mərkəzlərində mühafizə xidmətlərini əhatə edir. Bu çərçivədə 3 nömrəli Gəncə Peşə Liseyi, 1 nömrəli Gəncə Peşə Məktəbi, Tərtər Peşə Məktəbi, Qax Peşə Liseyi, həmçinin Sənaye və Yüksək Texnologiyalar üzrə Sumqayıt Dövlət Peşə Təhsil Mərkəzi mühafizə xidmətləri ilə təmin olunacaq. Bu obyektlərdə də stasionar postlar qurulacaq, mühafizə 9:00-21:00, 21:00-9:00 və ya tam sutkalıq rejimdə həyata keçiriləcək.

Hər iki tender üzrə xidmətlərin icrası 2026-cı il ərzində 10.5 ay müddətini əhatə edəcək və müsabiqələrə 26 yanvar 2026-cı il tarixində yekun vurulacaq. /Oxu.az