Bu il ölkə üzrə avtomobil yollarının və ictimai nəqliyyatın inkişafı üçün dövlət büdcəsindən əhəmiyyətli vəsait ayrılacaq. Maliyyə Nazirliyinin yaydığı məlumata görə, 2026-cı ildə “Avtomobil Yolları” Məqsədli Büdcə Fondunun gəlirləri və xərcləri bərabər olmaqla 250 milyon manat təşkil edəcək.

Sumqayit.tv xəbər verir ki, ayrılan vəsait əsasən ölkə ərazisində ümumi istifadədə olan respublika və yerli əhəmiyyətli avtomobil yollarının, eləcə də bu yollarla bağlı mühəndis qurğularının saxlanılması, istismarı və təhkim zolaqlarının qorunmasına yönəldiləcək. Bu çərçivədə Sumqayıt şəhərində yol infrastrukturunun saxlanılması və texniki vəziyyətinin yaxşılaşdırılması da nəzərdə tutulur.

Bununla yanaşı, “İctimai nəqliyyat” Məqsədli Büdcə Fondunun gəlirləri və xərcləri 155 milyon manat həcmində müəyyən edilib. Həmin vəsait Bakı, Sumqayıt, Gəncə, Naxçıvan və Xankəndi şəhərlərində, eləcə də Abşeron, Ağdam, Şuşa və Laçın rayonlarında nağdsız ödəniş sisteminə keçmiş nəqliyyat vasitələri ilə müntəzəm sərnişin daşımalarını həyata keçirən hüquqi şəxslərə və fərdi sahibkarlara subsidiya şəklində ödəniləcək.

Bu qərar Sumqayıtda fəaliyyət göstərən avtobus parkları və sərnişin daşımaları ilə məşğul olan daşıyıcılar üçün maliyyə yükünün azalması, eyni zamanda şəhərdaxili ictimai nəqliyyat xidmətlərinin keyfiyyətinin yüksəldilməsi baxımından mühüm hesab olunur.

Eyni zamanda, Nəqliyyat vasitələrinin utilizasiyası fondu üzrə də 52 milyon manat vəsait nəzərdə tutulub. Bu məbləğ utilizasiyaya verilmiş köhnə nəqliyyat vasitələri əvəzində yerli istehsal olan yeni nəqliyyat vasitələrinin alınması zamanı tətbiq edilən güzəştlərin satıcılara geri ödənilməsinə və birdəfəlik ödənişlərin həyata keçirilməsinə sərf olunacaq. Bu isə Sumqayıt daxil olmaqla iri şəhərlərdə nəqliyyat parkının yenilənməsinə töhfə verəcək.

Mütəxəssislərin fikrincə, ayrılan bu vəsaitlər Sumqayıtda ictimai nəqliyyatın daha sistemli, rahat və müasir formada təşkilinə, eləcə də yol infrastrukturunda mövcud problemlərin mərhələli şəkildə aradan qaldırılmasına imkan yarada bilər.

5-01-2026, 23:21 18