Dünya bazarında neftin qiymətində artım müşahidə olunur. Hazırda Azərbaycan nefti beynəlxalq bazarlarda bir barel üçün 100 dollardan yüksək qiymətlə təklif edilir.
İqtisadçı‑deputat Vüqar Bayramov bildirib ki, 2026‑cı ilin dövlət büdcəsində neftin bir barelinin qiyməti 65 dollar səviyyəsində nəzərdə tutulub. Onun sözlərinə görə, büdcədə hesablanan qiymət illik orta göstəriciyə əsaslanır və qısamüddətli qiymət dəyişiklikləri ilə müqayisə olunmamalıdır.
Deputatın sözlərinə görə, statistik məlumatlara əsasən, bu ilin yanvar ayında **Brent nefti**nin orta qiyməti 62,54 dollar, fevral ayında isə 66,6 dollar olub. Mart ayının ilk həftəsində isə dünya bazarında neftin qiyməti 84‑90 dollar intervalında dəyişib.
Qeyd olunub ki, 2026‑cı il dövlət büdcəsi gəlirlərinin təxminən 43 faizi, yəni 16,4 milyard manatı neft‑qaz sektorunun payına düşəcək. Bunun 12,8 milyard manatı isə **Azərbaycan Respublikası Dövlət Neft Fondu**ndan transfertlər hesabına formalaşacaq.
Vüqar Bayramov bildirib ki, neftin dünya bazar qiymətinin yüksəlməsi büdcə gəlirlərinin bir hissəsinə birbaşa təsir göstərir. Qiymətlərin yüksək olması Neft Fondunun gəlirlərinin və ölkənin valyuta ehtiyatlarının artmasına da səbəb olur.
Deputatın sözlərinə görə, büdcə gəlirlərinin artması milli təhlükəsizlik, işğaldan azad olunmuş ərazilərin bərpası və sosial müdafiə tədbirləri kimi prioritet sahələrə daha çox vəsait ayrılmasına imkan yaradır.
10-03-2026, 13:25
59
