Azərbaycanda minlərlə insan rəsmi əmək müqaviləsi olmadan çalışır. Bu isə gələcəkdə pensiya hüququnun formalaşmaması və ya çox zəif olması riski yaradır.

Sumqayıt.tv xəbər verir ki, məsələ ilə bağlı KONKRET.az-a açıqlama verən vəkil Xəzər Həsənov bildirib ki, Əmək pensiyaları haqqında qanun-a əsasən əmək pensiyası vətəndaşın əvvəl əldə etdiyi əməkhaqqı və digər gəlirlərinin kompensasiyası kimi müəyyən olunur.

Onun sözlərinə görə, pensiya hüququnun yaranması üçün əsas şərt məcburi dövlət sosial sığorta haqlarının ödənilməsidir. Bu ödənişlər işəgötürən və işçi tərəfindən Dövlət Sosial Müdafiə Fondu-na köçürülür və əməkhaqqı, mükafatlar, məzuniyyət haqları, eləcə də sahibkarlıq gəlirləri daxil olmaqla bütün gəlir növlərinə şamil olunur.

Vəkil qeyd edib ki, sosial sığorta sistemi ştatlı, mövsümi və müvəqqəti işçiləri, fərdi sahibkarları və digər kateqoriyaları əhatə edir. Lakin əmək münasibətləri rəsmi qaydada rəsmiləşdirilmədikdə bu ödənişlər həyata keçirilmir və nəticədə şəxsin pensiya hüququ formalaşmır.

Onun sözlərinə görə, qanunvericiliyə əsasən əmək pensiyası üç növ üzrə təyin olunur: yaşa görə, əlilliyə görə və ailə başçısını itirməyə görə. Bu pensiyalar sığorta və yığım hissələrindən ibarətdir.

Xəzər Həsənov vurğulayıb ki, əmək müqaviləsi olmadan işləyən şəxslər qısa müddətdə daha çox qazanc əldə etdiyini düşünsə də, bu, gələcəkdə onların pensiya almaq hüququndan və ümumilikdə sosial təminatdan məhrum qalmasına səbəb ola bilər.

Dünən, 20:15 14